होटल प्रबंधक ह करिस अइसन चमत्कार जेकर चर्चा पूरा छत्तीसगढ़ म होवत हे

भिलाई, नेशनल ग्रीन ट्रिब्यूनल के अध्यक्ष अऊ पूर्व न्यायाधीश धीरेंद्र मिश्रा हाले म जब भिलाई के होटल फ्लोरेट म कचरा प्रबंधन अऊ रेन वाटर हार्वेस्टिंग ल लेके करे गए उपाय ल देखिन। देखे के बाद ओ मन ये काम बर बधाई देवत बड़ बड़ई करिन। ये खबर ल छत्तीसगढ़ के बहुत अकन अख़बार मन ह प्रमुखता ले प्रकाशित करे रहिन।

जानकारी के मुताबिक होटल फ्लोरेट के महाप्रबंधक अमिताभ भट्टाचार्य जऊन छत्तीसगढ़ होटल एशोसिएशन के ज्वाइंट सेक्रेट्री घलोक हे ऊंखर कोति ले एक सामान्य प्लास्टिक के ड्रम म नल के टोटी लगाके कचरा के कुछ अइसन प्रबंधन करे गए हे जेखर से कचरा डाले के कुछ दिन बाद बेहतरीन जैविक खाद निकलथे। एखर अलावा ऊंमन रेन वाटर हार्वेस्टिंग अउ आन अनुपयोगी पानी के घलोक बढि़या प्रबंधन करे हे। एकर से ऊंखर होटल के अलावा आस-पास के भूजल के स्तर तेजी ले बाढ़ता जात हे।



कइसे मिलही सोना खाद
किचन ले दू प्रकार के अपशिष्ट निकलथे एक गीला अउ दूसरा सूखा, सूखा अपशिष्ट ल नगर निगम भिलाई ह रिसायकल करे बर ले जाथे। फेर गीला अपशिष्ट ल इमन विशेष प्रकार के बने अउ नगर निगम कोति ले देहे गए क्म्पोसिट ड्रम म रोजाना डाल देथें। एमा हफ्ता म एक पईत थोकन गोबर खाद मिलाथें जेखर से फर्मटेशन ले एक जैविक लिक्विड खाद प्राप्त होथे जऊन होटल के पेड़ पौधा मन बर खातू के काम करत हे। अतकेच नहीं ये लिक्विड के थोकन मात्रा 1 बाल्टी पानी म मिलाके टाइल के सफाई म उपयोग करे जा सकत हे ! मने एक पन्थ, कई काज वाला ये फार्मूला न केवल होटल इंडस्ट्री बर बल्कि घर मन बर घलोक कारगर साबित हो सकत हे।




कमिश्‍नर के मार्गदर्शन ले मिलीस सफलता
अपन शानदार सफलता के श्रेय नगर निगम भिलाई के आयुक्त श्री सुदेश कुमार सुन्दरानी ल देवत अमिताभ भट्टाचार्य ह बताईन के, उंकरे मार्गदर्शन ले ये संभव होय हे, हम भिलाई वासी हमेशा ऊंखर आभारी रहिबोन। ये हमार बर गर्व के विसय हे कि, होटल फ्लोरेट के ठोस अपशिष्ट पदार्थ अऊ रेन वाटर हार्वेस्टिंग के ए बेहतरीन प्रबंधन ल खास तौर ले देखे बर बहुत अकन मनखे सरलग आवत हे।



ए चमत्कार ल देखे पहुंचिन जस्टिस मिश्रा
ये होम कम्पोस्टिंग सिसटम ल देखे बर एन.जी.टी के राज्य स्तरीय मानिटरिंग कमेटी के अध्यक्ष अउ पूर्व न्यायाधीश श्री धीरेन्द्र मिश्रा ,श्री सौमिल रंजन चौबे ,सी ई ओ, सुडा, श्री आर के नारंग, डिप्टी सी ई ओ सूडा, अपर कलेक्टर संजय अग्रवाल, नगर निगम आयुक्त, भिलाई श्री सुदेश सुन्दरानी, श्री मनीष कश्यप, आर.ई.डी, श्री लाहरे, डिप्टी कमिश्नर, निगम के स्वास्थ्य अधिकारी धर्मेन्द्र मिश्रा, जावेद खान संग बहुत अकन विशिष्टजन उपस्थित रहिन।

लउछरहा..