छत्तीसगढ़ के कला-संस्कृति के प्रचार-प्रसार बर हर साल थीम निरधारित करके काम करे म बल

कलाकार परिषद बनाए म घलोक विचार-विमर्श
मुख्यमंत्री अऊ संस्कृति मंत्री ह लीन बैठक

रायपुर, मुख्यमंत्री श्री भूपेश बघेल अउ राज्य के संस्कृति अउ पर्यटन मंत्री श्री ताम्रध्वज साहू ह आज इहां महानदी भवन मंत्रालय म संस्कृति, धर्मस्व अउ धार्मिक न्यास, पुरातत्व अऊ पर्यटन विभाग के समीक्षा करिन। ए अवसर म जहां छत्तीसगढ़ के संस्कृति के प्रचार-प्रसार म जोर देहे गीस, उन्‍हें छत्तीसगढ़ के कला अऊ कलाकार मन ल बढ़ावा देहे के उद्देश्य ले कलाकार परिषद बनाए म घलोक विचार-विमर्श करे गीस। छत्तीसगढ़ के संस्कृति के व्यापक प्रचार-प्रसार बर हर साल एक थीम निरधारित करके काम करे म घलोक बल दे गीस।

बैठक म संस्कृति मंत्री ह बताइस कि राज्य म धर्मस्व अऊ धार्मिक न्यास के कोनो सेटअप नइ हे। बैठक म ए दृष्टि ले संस्कृति, धर्मस्व अउ धार्मिक न्यास के संयुक्त सेटअप बनाए म घलोक विचार-विमर्श करे गीस।

संस्कृति मंत्री ह बताइस कि हाल ही म उमन छत्तीसगढ़ के लोक कलाकार, साहित्यकार, छत्तीसगढ़ी फिल्म के निर्माता, निर्देशक अऊ फिल्म कलाकार मन के संग मुलाकात करे हें। उंखर कोति ले छत्तीसगढ़ के कला अऊ संस्कृति के विकास बर कार्ययोजना तैयार करे बर सुझाव आमंत्रित करे हे।

संस्कृति मंत्री ह बताइस कि छत्तीसगढ़ी व्यंजन के प्रचार-प्रसार अउ बढ़ावा देहे के दृष्टि ले संस्कृति विभाग परिसर म संचालित गढ़कलेवा के तर्ज म राज्य के सबो जिला मुख्यालय म गढ़कलेवा के स्थापना के प्रस्ताव हे। अइसनहे छत्तीसगढ़ हाट के जइसन बस्तर अउ सरगुजा हाट बनाए के घलोक विचार हे।

बैठक म मुख्यमंत्री ह महात्मा गांधी के 150वीं जयंती म होवइया कार्यक्रम मन के जानकारी लीन। संस्कृति विभाग के अधिकारी मन ह बताइन कि गांधी फाउण्डेशन के सहयोग ले अवइया महिना संगोष्ठी के आयोजन करे जाही। बैठक म छत्तीसगढ़ के विभूति मन के जानकारी घलोक कई ठन माध्यम मन ले नागरिक मन ल देहे के निर्णय ले गीस। छत्तीसगढ़ के संस्कृति विभाग अउ निजी संस्था मन के सहयोग ले ख्याति प्राप्त कलाकार स्वर्गीय श्री खुमान साव उपर आधारित श्रद्वांजली कार्यक्रम करे के घलोक निर्णय ले गीस।

बैठक म राज्य के ग्रामीण क्षेत्र मन म होवइया मेला-मड़ई के प्रचार-प्रसार के जरूरत म जोर दे गीस। अधिकारी मन ह बताइस कि राज्य म 73 मेला, उत्सव अऊ महोत्सव आयोजित करे जाथे अऊ एखर बर दू करोड़ 46 लाख रूपिया के अनुदान दे जाथे।

संस्कृति विभाग के अधिकारी मन ह जानकारी दीन कि छत्तीसगढ़ के कलाकार मन के पहिचान अउ परिचय बर चिन्हारी योजना संचालित हे, जेखर माध्यम ले ऑनलाइन पंजीयन करे जात हे। संस्कृति के कई ठन आयाम मन के प्रचार-प्रसार बर सहपीडिया ले सहयोग लेहे जात हे। अइसनहे कलाकार पेंशन योजना घलोक संचालित हे। अइसनहे ग्राम जामराव के उत्खनन कार्य के घलोक जानकारी देहे गीस।

बैठक म मुख्यमंत्री के प्रमुख सचिव श्री गौरव द्विवेदी, मुख्यमंत्री के सलाहकार श्री प्रदीप शर्मा, आयुक्त सह संचालक श्री अनिल साहू संग विभागीय अधिकारीगण उपस्थित रहिन।

ये बैठक के वीडियो देखव –

लउछरहा..