कोटवार मन बर कलेक्टर दर म पारिश्रमिक जरूरी – श्री टी.एस. सिंहदेव

अम्बिकापुर, पंचायत अउ ग्रामीण विकास, लोक स्वास्थ्य अउ कुटुंब कल्याण मंत्री श्री टी.एस. सिंहदेवने आज पीजी कॉलेज मैदान अम्बिकापुर म कोटवार संघ के सम्मेलन ल सम्बोधित करत कहिन के कोटवार मन बर गांव म जमीन आरक्षित रहिथे, जेखर से मिलइया आमदनी ओ मन ल पारिश्रमिक के रूप म मिलथे। उमन बताइन के आजादी के बाद ले कोटवार मन बर ये प्रथा चले आत हे। अभी हाल म घलोक कोटवार पंचायत कोति ले देहे गए जमीन म खेती करत आवत हें। उमन कहिन के मोर विचार ले कोटवार मन ल कम से कम कलेक्टर दर म पारिश्रमिक मिलना जरूरी हे। कहूं कोनो कोटवार तिर जमीन हे त ओखर से होवइया शुद्ध आय के गणना करत कलेक्टर दर म पारिश्रमिक देहे जाना जरूरी हे। कहूं जमीन ले होवइया आय कलेक्टर दर ले कम हे त अंतर के राशि ओ मन ल देहे जानी चाही। उमन बताइन के पारम्परिक रूप ले कोटवार के परिवार के सदस्य मन ल ही कोटवारी के दायित्व मिलते रहे हे। कोटवार के मृत्यु होए म उंखर पत्नी ल घलोक कोटवार बनाये जात रहे हे। कोटवार के लइका नइ होए म ओखर रिश्तेदार ल घलोक कोटवार बनाये गए हे। उमन कोटवार मन ल आश्वस्त करिन के राज्य सरकार से कोटवार मन ल कलेक्टर दर म पारिश्रमिक देहे म गंभीरतापूर्वक विचार करे जात हे। ए अवसर म जिला के कोटवार बड़ संख्या म उपस्थित रहिन।

लउछरहा..