लोकसभा चुनाव के पहिली चरन बर अधिसूचना

प्रदेश के बस्तर लोकसभा क्षेत्र बर सोमवार ले होही नामांकन दाखिल
रायपुर, लोकसभा निर्वाचन के पहिली चरण बर सोमवार 18 मार्च 2019 ले अधिसूचना जारी होवत हे। छत्तीसगढ़ म लोकसभा बर तीन चरन म मतदान होही। मुख्य निर्वाचन पदाधिकारी श्री सुब्रत साहू ह बताइस के अधिसूचना जारी होए के संगेच पहिली चरन म प्रदेश के बस्तर लोकसभा क्षेत्र बर नामांकन दाखिल करे के प्रक्रिया शुरू हो जाही। पहिली चरण बर प्रत्याशी अपन नामांकन पत्र शासकीय छुट्टी ल छोड़के काम के दिनन म बिहनिया 11 बजे ले मंझनिया 3 बजे तक 25 मार्च 2019 तारीक तक दाखिल कर सकत हें। 26 मार्च ले नामांकन पत्र के जांच होही। फारम भरईया मन 28 मार्च तक नामांकन पत्र वापस ले सकत हें। ए चरन म प्रदेश के 5 जिला के 8 विधानसभा क्षेत्र मन के मतदाता 11 अपरेल 2019 के दिन मतदान करहीं।
श्री साहू ह बताइस के पहिली चरण के मतदान बर जम्‍मो तइयारी हो गए हे। बस्तर लोकसभा क्षेत्र के 13 लाख 61 हजार 146 मतदाता अपन मताधिकार के परयोग कर सकहीं। इहां कुल मतदाता मन म 7 लाख 12 हजार 259 महिला, 6 लाख 59 हजार 824 पुरुष अउ 49 तीसरी लिंग के मतदाता हें। शत-प्रतिशत मतदान सुनिश्चित करे बर 1878 मतदान केन्द्र बनाय गए हे।
लोकसभा निर्वाचन के दूसर चरन बर 19 मार्च 2019 मंगलवार के दिन अधिसूचना जारी करे जाही। ए चरन म प्रदेश के कांकेर, महासमुंद अउ राजनांदगाँव लोकसभा क्षेत्र मन बर 18 अपरेल के दिन मतदान होही। उन्‍हें तीसर चरन बर 28 मार्च के दिन अधिसूचना जारी करे जाही। ए चरन म छत्तीससगढ़ के बांचे सबो सात सीट बर मतदान 23 अपरेल के दिन होही। प्रदेश के रायपुर, बिलासपुर, रायगगढ़, कोरबा, जाँजगीर, दुर्ग अउ सरगुजा लोकसभा क्षेत्र मन बर तीसर चरन म मतदान होही।

लउछरहा..