साहू समाज ल साधे खातिर नरेन्द्र मोदी के दाँव

हम कहिथन त कहिथे के काहत हे

धमेन्‍द्र निर्मल के सार समाचार, लोकसभा चुनई 2019 म छत्तीसगढ़ के बीजेपी प्रत्याशी मन कोति ले प्रचार करे खातिर प्रधानमंत्री मंगलवार के कोरबा पहुंचिस। कोरबा म आमसभा ल संबोधित करत पीएम मोदी हँ कांग्रेस उपर जमके निशाना साधिस। संगे संग क्षेत्र के जादा ले जादा मतदाता वर्ग साहू समाज ल बीजेपी के पक्ष म साधे खातिर प्रधानमंत्री नरेन्द्र मोदी हँ एके डांड़ कहिस। पीएम मोदी के ये डांड़ प्रदेश म साहू समाज ल साधे खातिर तुरूप के एक्का माने जावत हे।




पीएम नरेन्द्र मोदी हँ कोरबा म सभा ल संबोधित करत कांग्रेस के वो बयान उपर पलटवार करिन, जेमा कांग्रेस अध्यक्ष राहुल गांधी हँ कहे रिहिन कि हर चोर मोदी काबर होथे। नरेन्द्र मोदी कहिन कि वो कहिथे कि हर मोदी चोर होथे। छत्तीसगढ़ म साहू समाज के जो लोग हावय उही समाज ल गुजरात म मोदी कहिथे त का जम्मो साहू समाज के मनखे चोर हवय ? का उन मन ल अइसने भाखा के प्रयोग करना चाही ?




बता देथन कि छत्तीसगढ़ म करीबन 55 लाख साहू हवय। ये प्रदेश म बड़का मतदाता वर्ग हरय। अइसन म पीएम मोदी के ये डाँड़ बीजेपी के पक्ष म माहौल बनाए खातिर तुरूप के एक्का साबित हो सकत हे। पीएम नरेन्द्र मोदी हँ कोरबा संसदीय क्षेत्र के प्रत्याशी ज्योतिनंद दुबे, सरगुजा संसदीय क्षेत्र के प्रत्याशी रेणुका सिंह अउ रायगढ़ के प्रत्याशी गोमती साय के पक्ष म प्रचार करे खातिर कोरबा पहुंचे रिहिने।

चुचरू:- तोर पागी ल तो बने संभाल बोचकत हे तेकर पता नइ हे।
बोचकू:- चुप बे साले बड़ा लफर-लफर मारत हस।
चुचरू:- वाहादे ! हम कहिथन त कहिथे के काहत हे अउ अपन हँ दिन रात चुचरू-चुचरू काहत रहिथे त।




लउछरहा..