मुख्यमंत्री ‘यूथ कार्निवाल’ म होइन सामिल
रायपुर, मुख्यमंत्री श्री भूपेश बघेल ह कहिन कि छत्तीसगढ़ के नवनिर्माण म युवा मन के महत्वपूर्ण भागीदारी होना चाही। युवा मन के बदौलत बदलाव, क्रांति अऊ बदलाव होथे। उमन कहिन कि प्रदेश के नवनिर्माण म युवा मन ल बढ़-चढ़के हिस्सा लेना चाही। हमार प्रदेश के युवा मन म प्रतिभा के कोनो कमी नइ हे। युवा मन अपन प्रतिभा के बदौलत समाज म उंचा स्थान प्राप्त कर सकत हें। एखर बर युवा मन ल अपन प्रतिभा ल परिष्कृत करत रहना चाही। श्री भूपेश बघेल ह प्रदेश के युवा मन ल आश्वस्त करत कहिन कि राज्य के नौकरी अऊ रोजगार मन म जादा ले जादा भागीदारी छत्तीसगढ़ के युवा मन के रइही। श्री बघेल ह ओ बात आज श्री बलवीर सिंह जुनेजा इंडोर स्टेडियम म आयोजित ‘यूथ कार्निवाल ल सम्बोधित करत कहिन। कार्यक्रम म खाद्य अऊ संस्कृति मंत्री श्री अमरजीत भगत उपस्थित रहिन।
मुख्यमंत्री ह कहिन कि प्रदेशभर के छात्र-छात्रा मन यूथ कार्निवाल म उपस्थित हे। एमां ले बहुत अकन छात्र-छात्रा मन ह अपन प्रतिभा के प्रदर्शन करिन। उमन छात्र-छात्रा मन के सम्मान, ऊंखर उज्ज्वल भविष्य अऊ कार्यक्रम के सफल आयोजन बर बधाई अऊ शुभकामना दीन। श्री बघेल ह कहिन कि आगामी जनवरी महिना म स्वामी विवेकानंद जयंती के अवसर म तीन दिवसीय यूथ महोत्सव के आयोजन करे जाही। कार्यक्रम युवा मन के नाम म होही। उमन प्रदेश के युवा मन ल ये कार्यक्रम म बढ़-चढ़के भाग लेहे बर प्रेरित करिन। उमन प्रदेश के शहर अऊ गांव मन के विकास बर युवा मन ल आगू आए ल कहिन, ताकि प्रदेश के कोना-कोना के सुव्यवस्थित विकास हो सकय। उमन ये मौका म प्रतिभावान छात्र-छात्रा मन ल सम्मानित करिन। मुख्यमंत्री श्री भूपेश बघेल ह छात्र-छात्रा मन कोति ले आयोजित राष्ट्रपिता महात्मा गांधी जी के जीवनी उपर आधारित नाटिका ल सहराइन। कार्यक्रम म श्री गिरीश दुबे, श्री कन्हैया अग्रवाल, श्री आकाश शर्मा संग प्रदेशभर के छात्र-छात्रा मन उपस्थित रहिन।
