छत्तीसगढ़ी ल राजभाषा के दर्जा देवाए बर हम सब मिलके उदीम करबोन – श्री भूपेश बघेल

मुख्यमंत्री ह पद्मश्री स्वर्गीय पंडित श्यामलाल चतुर्वेदी के परिजन मन ले करिन मुलाकात

रायपुर, मुख्यमंत्री श्री भूपेश बघेल ह आज बिलासपुर म पद्मश्री अलंकरण ले सम्मानित स्वर्गीय पंडित श्यामलाल चतुर्वेदी के निवास पहुंचके ऊंखर परिवारजन ले मुलाकात करिन। मुख्यमंत्री ह ए अवसर म श्री श्यामलाल चतुर्वेदी ल विनम्र श्रद्धांजलि अर्पित करिन। उमन कहिन के श्री चतुर्वेदी के सपना ल पूरा करे बर अउ छत्तीसगढ़ी ल राज भाखा के दर्जा देवाए अऊ आठवीं अनुसूची म सामिल करे बर हम सब मिलके उदीम करबोन।
मुख्यमंत्री ह कहिन के श्री चतुर्वेदी ह जीवन भर छत्तीसगढ़ी भाखा अऊ छत्तीसगढ़ महतारी के सेवा करे हें। छत्तीसगढ़ी गुरतुर भाखा हे अऊ स्व. श्री चतुर्वेदी जी जुन्ना ले जुन्ना छत्तीसगढ़ी शब्द मन ल पिरोके ए गुरतुर भाखा के परयोग करत रहिन। श्री बघेल ह स्व. श्री चतुर्वेदी जी के निवास कॉलोनी चितले के प्रवेश द्वार के नामकरण श्री चतुर्वेदी के नाम म करे बर प्रस्ताव बनाए के निर्देश अधिकारी मन ल दीन। ए अवसर म तखतपुर विधायक श्रीमती रश्मि सिंह, स्व. श्री चतुर्वेदी के पुत्र श्री शशिकांत चतुर्वेदी अऊ श्री सूर्यकांत चतुर्वेदी अउ आन परिजन उपस्थित रहिन।

लउछरहा..