कांग्रेस के 72 हज़ार के घोसना म भाजपा के नारी जुड़ा गे

कांग्रेस अध्यक्ष राहुल गाँधी ह काल कहिन के कांग्रेस कहूँ सरकार बनाही त देश के सबले ग़रीब 20 फ़ीसदी परिवार ल हर साल 72 हज़ार रुपिया देहे जाही। राहुल के कहौती कांग्रेस सबो ल न्याय देहे जात हे। राहुल ह नरेंद्र मोदी ल आभा मारत कहिस के जब प्रधानमंत्री सबले अमीर मनखे मन ल पइसा दे सकत हे त कांग्रेस सबले ग़रीब मनखे मन ल पैसा दे सकत हे।
कांग्रेस अध्यक्ष ह पत्रकार मन ले कहिस के तीन राज्य म होए विधानसभा चुनाव के बेरा म हमन ये वादा करे रहेन के कहूं कांग्रेस जीतही त किसान मन के करजा माफ़ कर देबोन, कांग्रेस जीतिस अउ हम अइसन करेन घलाव। उमन कहिन के कांग्रेस देश ले ग़रीबी ल खतम कर देही। हम सबले ग़रीब मनखे मन के पहिचान करबो अउ ओ मन ल ग़रीबी ले हमेसा बर बाहिर निकाल देबोन।
गरीब मन ल 72 हजार देहे बर पइसा के घलोक हमन पूरा हिसाब कर लेहे हवन। दुनिया के गियानी-मानी अर्थशास्त्री मन ले हम ए योजना उपर चर्चा करे हवन। ए मा पहिली के वित्त मंत्री रहे पी. चिदंबरम घलव अपन पूरा टीम के संग काम करत हे। आप मन जानतेच हावव के मोदी सरकार ह लोकसभा चुनाव ले पहिली छोटे किसान मन के खाता म हर साल 6 हजार रुपया देहे के घोसना करे रहिस। येती राहुल ह चुनाव के ये बेरा म, ग़रीब परिवार ल 72 हज़ार सालाना मने 6 हज़ार रुपिया महीना देहे के घोसना करके भाजपा के नारी ल जुड़वा देहे हे। काबर के विधानसभा चुनाव म देखे ये गीस के रमन सरकार के जम्‍मो लाभकारी योजना के लाभ जनता मजे से लीस, सबे मुफत के समान मन ल झोंकिस अउ भूपेश के करजा माफी अउ धान के कीमत बढ़ोतरी के एवज म सत्‍ता ओकर झोली म दे दीस।

लउछरहा..