शासन के अल्पकालीन कृषि ऋण माफी योजना : किसान कुलेश्वर ह कहिस अब नइ हे ओ ह काखरो करजदार

रायपुर , मुख्यमंत्री श्री भूपेश बघेल से किसान मन के करजामाफी के घोषणा के बाद गरियाबंद जिला के किसान मन म घलोक उत्साह के माहौल बने हे। किसान मुख्यमंत्री ल धन्यवाद देवत थकत नइ हें। किसान मन के कहना हे के अब ओ मन छत्तीसगढ़िया किसान होए म गरब महसूस करत हें, काबर के उंखर पीरा ल समझइया मुख्यमंत्री अब शासन म हे।
किसान मन के करजामाफी के बारे म गोठ-बात करत गरियाबंद जिला के कोदोबतर गांव के किसान कुलेश्वर साहू ह घलोक उछाह के संग बताइस के तीन एकड़ जमीन म खेती बर खातू, बीज अऊ नगदी के रूप म 33 हजार रूपिया करजा ले रहिस, जऊन अब माफ हो गे। वो बताइस के ये राशि अब खाता म घलोक आ गे। अब ओ ह करजादार नइ हे।
ग्राम धमना (विकासखण्ड-गरियाबंद) के किसान रायसिंग गोड़ ह कहिन के शासन के ए पहल ले मोर 65 हजार 250 रूपये के करजा माफ होय हे। वो ह छत्तीसगढ़ सरकार ल धन्यवाद ज्ञापित करिस अऊ कहिन के सही म ये किसान हितैसी सरकार हे। उमन बताइस के 10 एकड़ जमीन म ओ ह किसानी के काम करथन, जेखर बर बैंक म आश्रित होना पथे। करजा के सेती मन म चिंता रहत रहिस, फेर सरकार के ए निर्णय लेहे म अऊ मोर पूरा कुटुंब खुश हे। उमन बताइस के करजा माफी ले मिले पइसा ले एक नवा बोर खनवाइस हे, जेखर से अब ओ ह अपन पूरा जमीन म डबल फसल ले सकही।
अइसनहे ग्राम पंचायत मरौदा के आश्रित ग्राम बम्हनी के किसान सुन्दर नेताम ह बताइस के उमन दू एकड़ खेत म खेती किसानी बर 18 हजार 500 रूपिया जिला सहकारी केन्द्रीय बैंक ले करजा ले रहिस, फेर सरकार कोति ले किसान मन के हित म लेहे गए निर्णय ले अब मोर करजा माफ हो गए हे। अब ए राशि के उपयोग रबी फसल बोवइ म लगाहूं। अब मोला फेर करजा लेहे ल नइ परय, जेखर बर मैं सरकार ल धन्यवाद देवत हंव।
गरियाबंद के जिला सहकारी बैंक के नोडल अधिकारी धनराज पुरबिया ह बताइस के ए साल 2018-19 जिला के आठ शाखा मन के 38 समिति मन के माध्यम ले कुल 25 हजार 764 किसान मन म 80 करोड़ 85 लाख 59 हजार रूपिया के करजा बकाया रहिस, जऊन ल अल्पकालिन करजा माफी योजना के तहत माफ करे गए हे। उमन बताइस के सहकारी बैंक मन के 12 हजार 770 किसान मन के लिंकिंग के माध्यम ले 36 करोड़ 85 लाख रूपिया कटौती करे गए राशि किसान मन के बचत खाता म ट्रांसफर कर दे गए हे। लीड बैंक अधिकारी ले मिले जानकारी के मुताबिक ग्रामीण बैंक म जिला म 12 शाखा मन के अंतर्गत 4777 किसान मन ल 29 करोड़ 38 लाख रूपिया के केसीसी करजा देहे गए हे।

लउछरहा..