अनियमित कर्मचारी मन बर करे गए वादा ल पूरा करे जाही : श्री भूपेश बघेल (देखव वीडियो)

मुख्यमंत्री ह अनियमित कर्मचारी महासभा ल सम्बोधित करिस

रायपुर, मुख्यमंत्री श्री भूपेश बघेल ह काल छत्‍तीसगढ़ी म भासन देवत कहिन के राज्य सरकार ह जन घोषणा पत्र म अनियमित कर्मचारी मन बर जऊन वादा करे हे, ओला खच्चित पूरा करे जाही। मुख्यमंत्री रईपुर के गांधी मैदान म अनियमित कर्मचारी महासभा ल सम्बोधित करत रहिन। उमन कहिन के ये सरकार आप मन के सरकार ये। अनियमित कर्मचारी घलोक किसान परिवार ले जुड़े हे अऊ छत्तीसगढ़ के बेटा-बेटी ये। कर्मचारी मन के मांग पूरा करे बर रद्दा निकाले जाही। उंखर मांग मन उपर संवेदनशीलता अऊ सहानुभूतिपूर्वक विचार करे जाही। ए साल किसान मन बर करे गए हे। अवइया साल कर्मचारी मन बर करबोन।

मुख्यमंत्री ह कहिन के वादा के मुताबिक राज्य सरकार ह ए साल किसान मन के करीबन दस हजार करोड़ रूपिया के किसानी करजा माफ करे गए हे अऊ किसान मन ल देश म सबले जादा धान के रेट 2500 रूपिया कुंटल देहे जात हे। अवइया साल किसानी करजा माफी के दस हजार करोड़ रूपिया के राशि बांचही। ए राशि ले कर्मचारी मन के हित म निर्णय लेहे जाही।

छत्तीसगढ़ संयुक्त अनियमित कर्मचारी सभा कोति ले आयोजित कार्यक्रम म राज्य सभा सांसद श्रीमती छाया वर्मा, नगर निगम रायपुर के महापौर श्री प्रमोद दुबे अऊ पूर्व महापौर श्रीमती किरणमयी नायक विशेष अतिथि के रूप म उपस्थित रहिन। मुख्यमंत्री श्री बघेल ह कहिन के जअसे चिटफंड कम्पनी ले प्रभावित मनखे मन बर रद्दा निकाले गए हे। वइसनहे कर्मचारी मन बर निकालबोन। छत्तीसगढ़ संयुक्त अनियमित कर्मचारी महासभा के प्रांताध्यक्ष श्री अनिल देवांगन ह कार्यक्रम म कर्मचारी मन के मांग मन के संबंध म जानकारी दीस। ए अवसर म बहुत अकन जनप्रतिनिधि अऊ बड़ संख्या म कर्मचारी उपस्थित रहिन।

लउछरहा..