अंजनी साहू ह चाकलेट बेंचके मनखे के जीवन म धोरत हें मिठास

बेमेतरा, जिहां चाह उहां राह ए हाना ल सहीं कर देखाए हे बदनारा गांव के अंजनी ह। स्वसहायता समूह ले जुरके अंजनी ह मनखे मन के जीवन म मिठास घोरत हे। वो ह चाकलेट बेंचके अपन जीवन यापन करत हे। अंजनी ह बेमेतरा जिला के नवागढ़ ब्लाग के अंतर्गत ग्राम पंचायत बदनारा के रहइया एक गरीब परिवार ले संबंध रखइया महिला हे। अंजनी साहू अपन चार लइका के भरण पोषण करत हे, अपन परिवार के जिम्मेदारी वो खुदे निभात हे, समूह ले जुरे के पहिली सामाजिक अउ आर्थिक स्थिति हमेशा चुनौतीपूर्ण बने रहत रहिस। एक साल पहिली विकासखण्ड नवागढ़ के बदनारा ग्राम म शीतला स्व सहायता समूह के गठन होइस अऊ अंजनी साहू ह सदस्यता ग्रहण करिस।
पाछू एक साल ले समूह कोति ले साप्ताहिक बैठक अउ बचत करे जात हे अऊ समूह के आन महिला मन अऊ संगें-संग अंजनी साहू के सामाजिक अउ अर्थिक स्थिति म बहुत सुधार होए हे। छै महिना पहिली अजनी साहू ह ये निर्णय लीस के ओ ह खुदे आजीविका बिहान के माध्यम ले अर्जित करना हे अउ अपन अऊ समूह के नाम रोशन करना हे। ओ हर ये निर्णय ले के कन्फेकश्नरी संबंधी व्यवसाय करना हे। जिला पंचायत बेमेतरा म पदस्थ डी पी एम कुमारी नेहा बंसोड से ए संबंध म दुर्ग ले जाके प्रशिक्षण देवाए गीस अउ चैकलेट बनाए बर जम्‍मो सामान के व्यवस्था करे गीस। प्रशिक्षण के बाद अंजनी साहू ह स्थानीय तौर म अपन व्यवसाय शुरू करिस जेखर से ओखर परिवार ल आर्थिक सहायता मिलीस। एकर बाद बिहान कोति ले आयोजित सरस मेला रायपुर अउ दुर्ग म स्टाल लगाके करीबन दस हजार रूपिया के आमदानी अर्जित करे हे, आज वो अपन व्यवसाय ले परिवार के भरन पोसन करत हे अऊ सामाज म अपन ओहदा ल ऊंचा करत हे।

लउछरहा..