किसान मन के समृद्धि शासन के पहली प्राथमिकता : श्री सिंहदेव

रायपुर, पंचायत अऊ ग्रामीण विकास मंत्री श्री टी. एस. सिंहदेव ह आज जिला मुख्यालय बेमेतरा म राज्य स्तरीय कृषि विकास अउ किसान कल्याण मेला के समापन समारोह म सामिल होइन। उमन कहिन के प्रदेश के किसान अऊ मजदूर मन ह हमला आशीर्वाद देहे हे। सरकार ह कार्यभार सम्भालतेच करजा माफी अऊ 2500 सौ रूपये प्रति क्विंटल समर्थन मूल्य म धान खरीदी के अपनो वादा पूरा ल करिस। प्रदेश के जनता ह जऊन जिम्मेदारी दे हे, ओला हमन पूरा करे हवन। जनघोषणा पत्र के जइसे जनता के मांग ल पूरा करना सरकार के पहली प्राथमिकता हे। स्वास्थ्य मंत्री ह कहिन के जिला अस्पताल बेमेतरा म सेट-अप के जइसे विशेषज्ञ डॉक्टर के 17 पद खाली हे। अइसनहे 100 बिस्तर के नवा लोकार्पित एम.सी.एस अस्पताल बर 11 विशेषज्ञ डॉक्टर के पद सेट-अप के अनुसार खाली हे ओला घलोक भरे जाही। स्वास्थ्य मंत्री श्री सिंहदेव ह कहिन के सरकार ह कार्यभार सम्भालतेच 345 नवा डॉक्टर मन के भर्ती करे हे। एमां ले 17 डॉक्टर मन के बेमेतरा जिला म पोस्टिगं करे गए हे।
ये अवसर म कृषि मंत्री श्री चौबे ह कहिन के चार दिवसीय ए मेला म बड़ संख्या म किसान मन ह अपन भागीदारी निभाये हें। मेला के आयोजन ले किसान मन ल सीखे ल मिले हे जेमा उन्नत खेती कइसे करे जा सकथे, आत्मनिर्भर कइसे बने जा सकथे। राज्य सरकार कोति ले 351 रूपिया प्रति कुंटल के दर म गन्ना के खरीदी करे जात हे। गौवंश के सरंक्षण बर चरवाहा रखे जाही अउ ओखर पैसा मनरेगा ले देहे जाही। कृषि मंत्री ह कहिन के मुख्यमंत्री कोति ले कृषि मेला म सामिल होके बेमेतरा जिला म फूडपार्क, शक्कर कारखाना के निर्माण, दुग्ध शीतलीकरण केन्द्र, उद्यानिकी कालेज, अउ बेमेतरा शहर बर बायपास रोड निर्माण के घोषणा करे हें। समापन समारोह म विधायक बेमेतरा श्री आशीष कुमार छाबड़ा, नवागढ़ विधायक श्री गुरूदयाल सिंह बंजारे, पण्डरिया विधायक श्रीमती ममता चन्द्राकर ह घलोक अपन विचार व्यक्त करिन। स्वागत भाषण अपर मुख्य सचिव श्री के.डी.पी.राव ह दीन। कृषि मेला के कम समय म सफल आयोजन बर कृषि मंत्री ह आयोजक मन ल बधाई दीन।

लउछरहा..