पांच दिन होगे भिलाई म नल ले पानी निकलत हे न हवा

भिलाई म नल के हवा -पानी दूनो बंद, आज चालू होए के संभावना

धर्मेन्‍द्र निर्मल के समाचार सार, भिलाई नगर निगम के जम्मो क्षेत्र म आज पांच दिन होए चाहत हे। इहां के नल मन पानी तो पानी ए हवा उछरे बर तको छोड़ दे हवयं। शिवनाथ इंटकबेल म अइसे का गड़बड़ी होगे के इहां के इंजीनियर मन तको एला नइ पकड़े पासत हे। पैनल बोर्ड, केबल अउ ट्रांसफार्मर जम्मो जघा दिन रात एक करके गड़बड़ी खोजई म लगे हे फेर वाह रे गड़बड़ – अता पता नइहे। कलेक्टर साहेब ह ए गड़बड़ी ल खोजे खातिर बिजली कंपनी के करमचारी के संगे संग बीएसपी के हुसियार दल ल घलो बलाए हे।
27 तारीक के शिवनाथ इंटकबेल म लगे ट्रांसफार्मर हं फूटगे तब आज तक जम्मो साहर म पानी के घोर संकट चलत हे। 6 तारीक के नवा ट्रांसफार्मर लगाए गीस उहू फूट गे। सात तारीक के दूसर नवा ट्रासफार्मर लगाए गइस उहू ह सरलग ट्रिप करत हे। अइसे बिजली विभाग अउ बीएसपी के हुसियार दल ह गड़बड़ी खोजे म जी जान से लगे रहिस अउ आज रतिहा बना तको डारिस।
एति पानी के नाम ल लेके चारोमुड़ा हाहाकार मचे हवय। भिलाई निगम ह टेंकर ले पानी सप्लाई करे के कोनो किसम के बेवस्था नइ करे हवय। जेकर सेती लोगन ल पानी खातिर तरसे बर परत हे। भिलाई निगम म सिरिफ 12 ठन टेंकर हावय उहु कम परत हे। अब दूसर निकाय मन ले टेंकर मांग के पानी भेजे जावत हे। एति बर समस्या अउ बिगड़त दसा ल देखत कलेक्टर साहेब मोर्चा संभाल डारे हे अउ खभर हवय के काली रात सब दुरूस्‍‍‍‍‍‍त कर लिए गए हे। नल ह आज चालू होए के संभावना हे।

चटकारा:-
फंदी बाई:- ते आन दिन पी भरके आवत रहे तेन ह आज काल दूदी ठन बोतल ल धर के लाए लगे हस। अतेक दरूहा होगे हस ? तोला थोरको लाज नइ लागय ?
मंदू राम :- उंउंउं पगली समझस नहीं, नल म पानी आबे नइ करत हे। काकरो घर जाबे त खाए बर भले मांग ले पानी मत मांग कहिथे, उही पाय के मैं पानी के जगहा म बोतल ल धर के लाए हौं ताकि हम ठीक ठाक खा पी सकन अउ ए हालत म घलो पीवत खावत घर के मनखे कहा सकन।

लउछरहा..