छत्तीसगढ़ के जम्‍मो घर म होही बिजली के अंजोर

  • मुख्यमंत्री श्री भूपेश बघेल अऊ केन्द्रीय ऊर्जा राज्य मंत्री श्री आर.के.सिंह मन करिन सौभाग्य योजना के समीक्षा
  • विषम अउ दुर्गम भौगोलिक क्षेत्र के घर मन म सोलर ले मिलही बिजली

रायपुर, छत्तीसगढ़ के 23 जिला के सबो घर अब बिजली के अंजोर ले जगमगाही। राज्य म चार जिला के 553 गांव मन के 20 हजार 134 घर अइसे हे जेमां बिजली नइ पहुंचे हे। प्रदेश के मुख्यमंत्री श्री भूपेश बघेल अऊ केन्द्रीय विद्युत, नवीन अउ नवीकरणीय ऊर्जा राज्य मंत्री श्री आर.के.सिंह के उपस्थिति म आज विधानसभा के समिति कक्ष म सौभाग्य योजना के क्रियान्वयन के समीक्षा करे गीस अउ निर्णय लेहे गीस के छत्तीसगढ़ म अभी तक रोशनी ले वंचित शत-प्रतिशत घर मन ल जल्द से जल्द रोशन करे जाही।
बैठक म जानकारी देहे गीस के अभी हाले म बीजापुर, सुकमा, दंतेवाड़ा अऊ नारायणपुर जिला मन के नक्सल समस्या ले प्रभावित क्षेत्र अउ विषम अउ दुर्गम प्राकृतिक-भौगोलिक परिस्थिति मन के सेती 20 हजार 134 घर मन म बिजली नइ पहुंचाये जा सके हे। एमां ले ग्रिड के उपलब्धता वाले 266 गांव मन के 7 हजार 987 घर अउ आफग्रिड के 287 गांव मन के 12 हजार 147 गांव बांचे हे। बैठक म निर्णय लेहे गीस के अइसन घर जिहां विद्युत लाईन के माध्यम ले बिजली नइ देहे जा सकय, उहां क्रेडा के माध्यम ले सोलर होम लाईट सिसटम ले बिजली पहुंचाये जाही।
बैठक म सौभाग्य सहज बिजली हर घर योजना अऊ दीनदयाल उपाध्याय ग्राम ज्योति योजना के समीक्षा के समय जानकारी देहे गीस के छत्तीसगढ़ म सौभाग्य योजना 11 अकटूबर 2017 ले चालू करे गए रहिस। राज्य म अभी तक सबो 27 जिला के शत-प्रतिशत गांव मन ल विद्युतीकृत कर देहे गए हे। एमां ले 23 जिला मन के शत-प्रतिशत घर मन म बिजली पहुंच गए हे। राज्य के बाचे चार जिला मन बीजापुर जिला के 89.2 प्रतिशत, दंतेवाड़ा जिला के 99.2 प्रतिशत, सुकमा के 84.16 प्रतिशत अउ नारायणपुर जिला के 93.08 प्रतिशत घर मन म बिजली पहुंच गए हे।
क्रेडा के मुख्य कार्यपालन अधिकारी ह बताइस के जऊन घर मन म लाईन के माध्यम ले बिजली नइ पहुंच पाही उहां क्रेडा के माध्यम ले होम लाईट सिसटम के संग बिजली देहे जाही। हम आप ल बता देवन के होम लाईट सिसटम म घर मन म 200 वॉट के सोलर पेनल अउ रिचार्जएबल लीथियम बैटरी लगाये जाथे, जेखर माध्यम ले पांच एलईडी बल्ब, एक पंखा अऊ एक मोबाइल चार्जिंग यूनिट लगाये जाथे। ये मां एक सोलर यूनिट के खरचा 50 हजार रूपिया आथे, जेमां शासन कोति ले अनुदान देहे जाथे।
बैठक म छत्तीसगढ़ के मुख्य सचिव श्री सुनील कुमार कुजूर, पुलिस महानिदेशक श्री डी.एम.अवस्थी, मुख्यमंत्री अउ ऊर्जा विभाग के सचिव श्री गौरव द्विवेदी, ऊर्जा विभाग के विशेष सचिव अउ छत्तीसगढ़ विद्युत वितरण कंपनी के एमडी श्री मोहम्मद कैसर अब्दुल हक, छत्तीसगढ़ राज्य विद्युत कम्पनी के अध्यक्ष श्री शैलेन्द्र शुक्ला, डायरेक्टर छत्तीसगढ़ राज्य विद्युत कंपनी द्वय श्री जी.से. मुखर्जी अउ श्री एच.आर. नरवरे, क्रेडा के मुख्य कार्यपालन अधिकारी श्री कटियार घलोक उपस्थित रहिन।

लउछरहा..