150 लीटर अवैध शराब अऊ नौ हजार किलो मउहा लाहन पकड़ाईस

पानी पॉउच अऊ पॉलीथिन म भरे मिलीस शराब
महानदी ले नहर के संग पानी लाके बनात रहिन शराब
पैकिंग करे के साजो-सामान घलोक जब्त

रायपुर, प्रदेश म लोकसभा चुनाव के चलत निगरानी दल मन कोति ले अवैध गतिविधि अऊ परिवहन म कड़क निगरानी रखे जावत हे। ए सिलसिला म आज बलौदाबाजार-भाटापारा जिला म आबकारी विभाग ल बड़का कामयाबी मिलीस। आबकारी विभाग कोति ले उहां 150 लीटर अवैध शराब अऊ नौ हजार किलोग्राम मउहा लाहन जब्त करे गीस। अवैध शराब पैकिंग करे के साजो-सामान संग बड़ अकन पाउच अऊ पॉलीथिन म भरे शराब घलोक बरामद करे गीस।
आबकारी विभाग के अधिकारी मन ह इहां बताइन के कसडोल वृत्त के गश्ती दल ह आज जांजगीर-चांपा जिला के सरहद ले लगे महानदी अऊ जोंक नदी के सीमा म छापामार शैली म कार्रवाई करिन। गश्ती दल ह अवैध कारोबार ले जुड़े संदिग्ध स्थान घटमड़वा अऊ हसुवा बलौदा सबरिया डेरा म 150 लीटर अवैध हाथभट्टी शराब अऊ नौ हजार किलोग्राम मउहा लाहन बरामद करिस। दल ल पॉलीथिन अऊ प्लास्टिक पाउच म भरे शराब घलोक मिलीस। महानदी ले करीबन 200 मीटर दूरिहा नहर के संग पानी ले जाके एकर उपयोग अवैध शराब बनाए म करे जात रहिस। शराब पेक करे के मसीन अऊ सामान घलोक टीम ह बरामद करे हे।
गश्ती दल ल गिधौरी तीर घटमड़वा म महानदी करार म गड्ढा मन म पानी सकेल के अवैध शराब बनाए बर बोरी मन म भरके रखे मउहा लाहन तको मिलीस। उहां बड़े-बड़े प्लास्टिक डराम म घलोक महुआ लाहन पानी म बुड़ोके रखे गए रहिस। एखर बर पाइप लाइन बिछाके 200 मीटर दूरिहा ले नदी के पानी चोरी करके लाये जात रहिस। अवैध शराब बनाए बर उहां बड़का-बड़का चूलहा बनाये गये रहिस जिहां एल्युमिनियम के बड़का बर्तन मन म शराब बनाय जात रहिस। छापामारी के बेरा म उहां कई प्लास्टिक जरीकेन म भरे 130 लीटर अउ पॉलीथिन म भरे दस लीटर महुआ शराब बरामद करे गीस। संगेच भारी मात्रा म महाराजा पानी पाउच के पैकेट म भरे महुआ शराब, खाली पानी पाउच के रोल अऊ तीन नग पाउच पैकिंग मशीन घलोक जब्त करे गीस। कार्रवाई के समय करीबन सात हजार किलोग्राम मउहा लाहन बरामद करके मौकेच म नष्ट करे गीस।
गश्ती दल ह अइसनहे जोक नदी तीर ग्राम हसुआ बलौदा सबरिया डेरा म बनाए जात अवैध शराब ल घलोक पकडि़स। उहां घलोक प्लास्टिक के ड्रम मन म भरे मउहा लाहन, जरीकेन म भरे मउहा शराब अऊ एल्युमिनियम के बड़े-बड़े बर्तन बरामद करे गीस। गश्ती दल ह उहां दू हजार किलोग्राम मउहा लाहन अऊ दस लीटर शराब जब्त करिस। इंखर मन के खिलाप आबकारी अधिनियम के धारा 34(1)(क)(च) अउर धारा 34(2) के अन्तर्गत प्रकरण कायम कर विवेचना म लेहे गए हे।

लउछरहा..