करजा माफी ले किसान मन म हे खुशी के माहौल : श्री भूपेश बघेल

भिलाई-चरौदा नगर निगम बर 5 करोड़ रूपिया के मंजूरी
मुख्यमंत्री सामिल होइन नागरिक अभिनंदन समारोह म

रायपुर, मुख्यमंत्री श्री भूपेश बघेल ह कहिन के करजा माफी ले किसान मन म उत्साह अऊ खुशी के माहौल हे। मुख्यमंत्री ह कहिस के करजा माफी करे के निर्णय के बाद म मैं सरलग किसान मन ले मिले हंव। हमार किसान मन ह कई सपने देखे रहिन, फेर ओ मन अपन सपना करजा के सेती पूरा नइ कर पावत रहिन। ए निर्णय ले लाखों किसान मन के छोटे-छोटे खुसी पूरा होइस हे अऊ ओ मन ल अपन खेती-किसानी ल आगू बढ़ाये बर अवसर मिले हे।
मुख्यमंत्री ह दुर्ग जिला के भिलाई म आयोजित नागरिक अभिनंदन समारोह म बताइन के अर्जुन्दा के एक किसान ऊंखर तिर आइन अऊ ग्यारा हजार रुपिया के चेक मुख्यमंत्री सहायता कोष बर दीस। उमन कहिन के राज्य शासन के पहल ले खेती-किसानी ल संजीवनी मिले हे, मोर मूड़ ले करजा के बोझा हटिस त किसान के रूप म मैं ह घलोक अपन दायित्व समझत मुख्यमंत्री सहायता कोष म ये सहायता राशि देवत हंव। मुख्यमंत्री ह बताइन के एखर से छत्तीसगढ़ के अर्थव्यवस्था ल घलोक संजीवनी मिले हे, काबर के बाजार के ताकत किसान ले हे। किसान मन के आर्थिक स्थिति खराब होए ले बाजार म नकारात्मक प्रभाव परथे।
अभिनंदन समारोह म नगरीय प्रशासन अऊ विकास मंत्री डॉ. शिव डहरिया ह घलोक संबोधन दीन। उमन कहिन के मुख्यमंत्री के मन के मुताबिक भिलाई-चरौदा नगर निगम के विकास बर 5 करोड़ रुपए के राशि देहे जाही। डॉ. डहरिया ह कहिन के छत्तीसगढ़िया माटी पुत्र मुख्यमंत्री बने हे। अब हमार पुरखा मन के सपना पूरा होही।

लउछरहा..