महिला मन के आत्मनिर्भर बने ले होही समाज के विकास – मंत्री श्रीमती अनिला भेंड़िया

बालोद, प्रदेश के महिला अउ बाल विकास अउ समाज कल्याण मंत्री अउ जिला के प्रभारी मंत्री श्रीमती अनिला भेंड़िया ह कहिन के महिला मन के आत्मनिर्भर बने ले समाज के विकास होही। महिला मन अपन मेहनत अऊ लगन ले हर एक क्षेत्र म आगू बढ़त हेंं। देश के विकास म महिला मन के महत्वपूर्ण भूमिका हे। मंत्री श्रीमती अनिला भेंड़िया आज जिला के तहसील मुख्यालय डौण्डी म आयोजित जिला स्तरीय महिला सशक्तिकरण सम्मेलन ल मुख्य अतिथि के आसंदी ले सम्बोधित करत रहिन। उमन कहिन के महिला मन ल आत्मनिर्भर बने बर शिक्षित अऊ जागरूक होना जरूरी हे। महिला अउ बाल विकास विभाग कोति ले महिला मन के बेहतरी बर कई कल्याणकारी योजना संचालित करे जात हे। महिला मन शासन के योजना के लाभ लेके सशक्त बनत हें। उमन कहिन के मुख्यमंत्री कन्या विवाह योजना के राशि पन्द्रा हजार रूपिया ले बढ़ाके अब पच्चीस हजार रूपिया कर दे गए हे। प्रदेश सरकार कोति ले कमेच समय म जनहित के बहुत अकन महत्वपूर्ण फैसला लेहे हे। किसान मन के अल्पकालीन कृषि ऋण माफ करे गए हे। किसान मन के राष्ट्रीयकृत बैंक मन ले लेहे गए अल्पकालीन ऋण घलोक माफ करे गीस। उमन कहिन के किसान मन के धान 2500 रूपिया प्रति क्विंटल के दर ले खरीदे गीस। मंत्री श्रीमती भेंड़िया ह कहिन के प्रदेश के विकास म सबो सहभागी बनव। सम्मेलन ल गुण्डरदेही विधायक श्री कुंवर सिंह निषाद, बालोद विधायक श्रीमती संगीता सिन्हा अऊ जिला पंचायत उपाध्यक्ष श्री संजय चन्द्राकर ह घलोक संबोधित करिन। कलेक्टर श्रीमती रानू साहू ह प्रतिवेदन प्रस्तुत करिन।

लउछरहा..