प्रदेश म नियमित पद म शिक्षक के भर्ती बर विज्ञापन जारी

रायपुर, मुख्यमंत्री श्री भूपेश बघेल के सरकार ह प्रदेश म पहिली पइत नियमित पद म 15 हजार शिक्षक के भर्ती करे जात हे। लोक शिक्षण संचालनालय कोति ले आज इन्द्रावती भवन ले विज्ञापन जारी करके खाली पद मन म भर्ती के प्रक्रिया शुरू कर देहे हे। खाली पद मन के पूर्ति बर ऑनलाईन आवेदन आमंत्रित करे गए हे। विज्ञापित पद मन के जरूरी योग्‍यता, आयु सीमा, निर्देश, परीक्षा योजना, पाठ्यक्रम, पद मन के आरक्षण संबंधी विस्तृत विवरण के जानकारी cgvypam.choice.gov.in म 26 मार्च 2019 ले देखे जा सकत हे अऊ 25 अपरेल 2019 तक ऑनलाईन आवेदन करे जा सकत हे। ए भर्ती म व्याख्याता, शिक्षक, सहायक शिक्षक तीनों संवर्ग मन बर परीक्षा होही। सबले जादा विज्ञान शिक्षक मन के पद म भर्ती करे जाही।
मुख्यमंत्री ह गणतंत्र दिवस समारोह म शिक्षक मन के भर्ती के ऐलान करे रहिन। राज्य सरकार के ये बड़का फइसला ले युवा मन म भारी उछाह हे। नियमित पद मन म शिक्षक मन के भर्ती होए ले शिक्षा व्यवस्था म सुधार होही अऊ स्कूल मन म शिक्षक मन के कमी तको दूर होही। बस्तर, सरगुजा संग प्रदेश के आदिवासी इलाका मन म विज्ञान, गणित, कॉमर्स के शिक्षक मन के घलोक पूर्ति होही।

लउछरहा..