छत्तीसगढ़ म अब नाम के राजनीति – भाजपा कांग्रेस आमने सामने

छत्तीसगढ़ के भूपेश सरकार ह जुन्ना सरकार के योजना मन के नाम ल बदल दिए हे। सरकार ह फैसला करे हे कि पं. दीनदयाल उपाध्याय के नाम से चलत सरकारी योजना मन के नाम ह अब इंदिरा गांधी, राजीव गांधी अउ बबा भीमराव अंबेडकर के नाम से होही। सरकार ए फैसला के बाद भाजपा वाले मन खखुआ गे हें अउ काहत हे कांग्रेस पार्टी ह दुर्भावनापूर्ण व्यवहार करत हे।
भाजपा प्रवकता गौरीशंकर श्रीवास के कहना हे के योजना ह कोनो पार्टी विशेष के नइ होके देश भर बर होथ फेर कांग्रेस ह नैतिकता ल गंवा डारे हे। आखिर कांग्रेस ह अपन असली चेहरा ल देखा डारिस। उही कोति कांग्रेस के प्रवक्ता सुशील आनंद शुक्ला के कहिन के पहिली जम्मो योजना मन उहीच नाम से चलत रिहिसे जेला भाजपा वाले बदल के चलावत रिहिसे। कांग्रेस ह तो वोला उन्कर मूल रूप लाने हे।
अब एकर बाद नगरीय प्रशासन विभाग के आदेश के बाद पं. दीनदयाल उपाध्याय स्वावलंबन योजना अब राजीव गांधी स्वावलंबन योजना, पं. दीनदयाल सर्वसमाज मांगलिक भवन योजना डॉ भीमराव अंबेडकर सिर्वसमाज मांगलिक भवन योजना, पं दीनदयाल उपाध्याय एलईडी पथ प्रकाश योजना इंदिरा एलईडी पथ प्रकाश योजना, पं दीनदयाल आजीविका केन्द्र योजना अब राजीव गांधी आजीविका केन्द्र योजना , पं दीनदयाल शुध्द पेयजल योजना अब इंदिरा प्रियदर्शिनी शुध्द पेयजल योजना के नाम से जाने जाही।
धर्मेन्‍द्र निर्मल के सार समाचार

लउछरहा..