chhattisgarhi-samachar- रायपुर के गौरवशाली साइंस कॉलेज भविष्य म घलोक छुवय नवा ऊंचाई

मुख्यमंत्री सामिल होइन शासकीय नागार्जुन स्नातकोत्तर महाविद्यालय के वार्षिक स्नेह सम्मेलन म

रायपुर, मुख्यमंत्री श्री भूपेश बघेल आज राजधानी रायपुर म शासकीय नागार्जुन स्नातकोत्तर महाविद्यालय के वार्षिक स्नेह सम्मेलन म सामिल होइन। मुख्यमंत्री ह अपन सम्बोधन म कहिन के रायपुर के ए प्राचीन महाविद्यालय के बहुत अकन महत्वपूर्ण अऊ गौरवशाली उपलब्धि रहे हे। ए महाविद्यालय के विद्यार्थी मुख्यमंत्री अऊ मुख्य सचिव संग बहुत अकन महत्वपूर्ण पद मन म पहुंचे हे। उमन आशा व्यक्त करत कहिन के आवइया भविष्य म घलोक महाविद्यालय के विद्यार्थी अपन प्रतिभा, लगन अऊ मेहनत ले नवा-नवा ऊंचाई मन ल छूए म सफल होही। श्री बघेल ह महाविद्यालय के प्रगति बर राज्य शासन कोति ले हर संभव सहयोग के आश्वासन दीन।
हम आप ल बता देवन के मुख्यमंत्री श्री बघेल खुदे रायपुर के साइंस कॉलेज के विद्यार्थी रहे हें। उमन अपन विद्यार्थी जीवन के जुन्ना दौर ल सुरता करत कहिन के ओ समय घलोक विद्यार्थी वार्षिक सम्मेलन के तैयारी जोर-शोर ले करत रहिन। उही उत्साह आज के पढ़ईया लईका मन म घलोक देखे ल मिलत हे।
कार्यक्रम के अध्यक्षता उच्‍च शिक्षा मंत्री श्री उमेश पटेल ह करिन। कॉलेज के प्राचार्य डॉ. डी.एन. वर्मा ह स्वागत भाषण दीन। उमन बताइन के 1948 म ए कॉलेज के स्थापना होये रहिस। 1985 म एला आदर्श महाविद्यालय के दर्जा मिलीस अऊ 1988 म ये स्वशासी महाविद्यालय बनिस। अभी हाल म इहां 2600 छात्र-छात्रा अध्ययन करत हे। गौरव के बात हे के महाविद्यालय के 120 पढ़ईया लईका मन ह पी.एच.डी. अऊ डीलिट के उपाधि प्राप्त करे हें। अभी हाल म 25 विद्यार्थी शोध काम करत हे। ए अवसर म महाविद्यालय के शिक्षक, अधिकारी-कर्मचारी अऊ छात्र-छात्राएं बड़ संख्या म उपस्थित रहिन।

लउछरहा..