महान स्वतंत्रता संग्राम सेनानी मन ल समर्पित हे राजधानी के शहीद स्मारक भवन

रायपुर, मुख्यमंत्री श्री भूपेश बघेल ह काली रात राजधानी रायपुर के शहीद स्मारक भवन के नवा साज-सज्जा के संग लोकार्पण करिन। उमन स्मारक परिसर म स्थापित स्वतंत्रता संग्राम सेनानी स्वर्गीय श्री कमल नारायण शर्मा के प्रतिमा के अनावरण करिन।
मुख्यमंत्री ह ए अवसर म स्वतंत्रता संग्राम सेनानी पद्मश्री डॉ. महादेव प्रसाद पाण्डेय अऊ श्री पन्नालाल पण्ड्या संग स्वर्गीय श्री कमल नारायण शर्मा के भाई श्री चंद्रप्रकाश शर्मा अऊ पुत्री श्रीमती सविता पाठक ल शॉल अउ श्रीफल भेंट करके सम्मानित करिन। मुख्यमंत्री ह कार्यक्रम ल संबोधित करत कहिन के ये मोर सौभाग्य हे के मोला स्वतंत्रता संग्राम सेनानी स्वर्गीय श्री कमल नारायण शर्मा के प्रतिमा के अनावरण करे के अवसर मिलीस। अपन बात मन ल बेबाक तरीका ले रखे बर रायपुर म कोनो नाम जाने जाथे त वो श्री कमल नारायण शर्मा जी के नाम हे। हमला गरब हे के हम अइसन महापुरूष के नगरी म रथन।
मुख्यमंत्री ह कहिन के शहीद स्मारक भवन स्वतंत्रता संग्राम आंदोलन म योगदान देवइया महापुरूष मन के सुरता ल संजोये गए हे। काली ये नवा साज-सज्जा के संग लोकार्पित होय हे। हर इतवार के दिन इहां आयोजित होवइया लाईट एण्ड साउण्ड कार्यक्रम के माध्यम ले स्वतंत्रता संग्राम सेनानी मन बर, विशेषकर शहीद वीर नारायण सिंह के बारे म बताइए गए हे, जेखर से युवा अऊ लइका ऊंखर व्यक्तित्व के बारे म जान सकहीं। मुख्यमंत्री ह शहीद स्मारक भवन ल नवा साज-सज्जा के संग निर्माण करे बर नगर निगम अऊ स्मार्ट सिटी लिमिटेड के पदाधिकारी मन ल बधाई दीन। कार्यक्रम के सुरू म स्वतंत्रता संग्राम आंदोलन म देश के तरफ प्रदेश के महापुरूष मन के योगदान उपर आधारित लाईट एव साउण्ड लेजर शो प्रस्तुत करे गीस।

ए अवसर म राज्यसभा सांसद श्रीमती छाया वर्मा, रायपुर नगर निगम रायपुर के महापौर श्री प्रमोद दुबे, विधायक सर्वश्री कुलदीप जुनेजा, विकास उपाध्याय, श्रीमती अनिता योगेन्द्र शर्मा, नगर निगम रायपुर के सभापति श्री प्रफुल्ल विश्वकर्मा, नेताप्रतिपक्ष श्री सूर्यकांत राठौर संग निगम के पार्षदगण, कलेक्टर डॉ. बसवराजु एस., वरिष्ठ पुलिस अधीक्षक श्री आरिफ शेख, नगर निगम के आयुक्त श्री शिव अनंत तायल, लोक निर्माण विभाग के प्रमुख अभियंता श्री डी.के.अग्रवाल संग प्रबुद्ध नागरिक बड़ संख्या म उपस्थित रहिन।
हम आप ल बता देवन के राजधानी रायपुर के रजबंधा मैदान म बने शहीद स्मारक भवन ल सुविधा संपन्न बनाए अउ येला आकर्षक स्वरूप प्रदान करे म नगर पालिक निगम, लोक निर्माण विभाग, रायपुर स्मार्ट सिटी लिमिटेड मन ह मिल के अंदर अउ बाहिर के विकास अउ सौंदर्यीकरण के काम करे हें। ये देश के पहला अइसन आडिटोरियम हे, जेमां 3 डी प्रोजेक्टर मैंपिंग के सुविधा हे। एमा शहीद मन उपर आधारित करीबन 11 मिनट के लेजर शो भवन के फ्रंट फेस म हर हफ्ता देखाये जाही। भवन के भीतर 650 सीटर ऑटोमेटिक एयरकंडीशन हॉल अऊ मंच के बीच बने एकॉस्टिक डोम घलोक विशिष्ट हे। ए स्थल म महान स्वतंत्रता संग्राम सेनानी, छत्तीसगढ़ के माटी पुत्र स्व. कमलनारायण शर्मा के प्रतिमा घलोक स्थापित करे गए हे। ए भवन के छत म टेरेस गार्डन जिहां हरियाली के अहसास कराही, उन्‍हें परिवार के संग अवइया मनखे मन बर लइका मन के खेले के सुविधा घलोक इही छत म बनाए जाही। ये सबे सुविधा मन के बिवस्‍था लोक निर्माण विभाग, स्मार्ट सिटी लिमिटेड अऊ नगर निगम कोति ले करे गए हे।
स्वतंत्रता संग्राम सेनानी स्वर्गीय श्री कमलनारायण शर्मा के परिचय– छत्तीसगढ़ के माटीपुत्र, समाजवादी चिंतक, गांधीवादी नेता स्वतंत्रता संग्राम सेनानी, यशस्वी अधिवक्ता स्वर्गीय श्री कमलनारायण शर्मा के सम्पूर्ण जीवन न्याय बर संघर्ष अउ लोक कल्याण के प्रति समर्पण के गाथा हे। ओ मन ल आजादी के आंदोलन के समय ब्रिटिश जेल म कठोर कारावास म रखे गए रहिन। ओ मन प्रजातंत्र के सच्चा प्रहरी अउ जनजागरूकता के पैरोकार रहिन। स्वर्गीय श्री शर्मा के जीवन सच्चाई के सिद्धांत अउ निष्ठा के ओ सख्त जमीन म खड़े रहिन जउन न कभू झुकिस न बिकिस अऊ न टूटिस। राजनीतिक जगत म सिद्धांत अऊ आदर्श के प्रति ये अटूट समर्पण ही उंखर विशिष्ट पहिचान रहिस।

लउछरहा..