बालिका मन ल शिक्षा के क्षेत्र म आगू लाय बर करे जाही बेहतर प्रयास: डॉ. डहरिया

  • 99 लाख रूपिया लागत के नवा स्कूल भवन के करिन लोकार्पण
  • नगरीय प्रशासन मंत्री शासकीय रायखेड़ा स्कूल के वार्षिकोत्सव म होइन सामिल
  • शाला विकास काम मन बर 15 लाख देहे के घोषणा

रायपुर, नगरीय प्रशासन अऊ श्रम मंत्री डॉ. शिवकुमार डहरिया ह काल देर रात तिल्दा विकासखण्ड के शासकीय हायर सेकेण्डरी रायखेड़ा म वार्षिकोत्सव कार्यक्रम म सामिल होइन। ए मौका म डॉ. डहरिया ह 99 लाख रूपिया के लागत ले बने नवा हायर सेकेण्डरी स्कूल भवन के लोकार्पण करिन। डॉ. डहरिया ह शाला विकास काम मन बर 15 लाख रूपिया देहे के घोषणा करिन। ये मां 5 लाख रूपिया विधायक निधि के सामिल हे। डॉ. डहरिया ह कार्यक्रम ल सम्बोधित करत कहिन के राज्य सरकार छात्र-छात्रा मन बर, विशेषकर बालिका मन ल शिक्षा के क्षेत्र म आगू लाय बर बेहतर प्रयास करत हे। हम सबको बालिका मन के शिक्षा ल बेहतर करे बर सहभागी बने के जरूरत हे। सरकार शिक्षा ल जादा प्रभावी बनाए के संगेच पढ़ईया लईका मन ल प्रोत्साहन घलोक देथे। शिक्षा ले जीवन के अंधकार दूर करे जा सकत हे। छात्र-छात्रा मन अऊ युवा साथी मन सही दिशा म ज्ञान अर्जित करके समाज म उंचा स्थान बना सकत हें। संगेच ओ मन अपन परिवार के मनखे मन के संग समाज ल सही मार्गदर्शन प्रदान कर सकत हें।




मंत्री डॉ. डहरिया ह कहिन के समय मूल्यवान हे। पढ़ईया लईका मन ल दृढ़ इच्छा, लगन अऊ कड़ा मेहनत ले अपन लक्ष्य के तरफ बढ़ना चाही। उमन पढ़ईया लईका मन ले कहिन के ओ मन शिक्षा, खेलकूद अउ सामाजिक क्षेत्र म उत्कृष्ठ काम कर घर-परिवार संग देश अऊ प्रदेश म अपन नाम रोशन कर सकत हें। डॉ. डहरिया ह ए दौरान विद्यालय के प्रतिभावान छात्र-छात्रा मन ल पुरस्कार वितरित करके सम्मानित घलव करिन। कार्यक्रम म धरसींवा के विधायक श्रीमती अनिता शर्मा, श्री योगेन्द्र नायक, श्री देवव्रत नायक, श्री संतोष कुर्रे, मन्नूलाल वर्मा, श्री आनंद गिलहरे अऊ रायखेड़ा के सरपंच श्री खिलावन शर्मा संग शिक्षकगण अऊ छात्र-छात्रा मन बड़ संख्या म उपस्थित रहिन।



लउछरहा..