सामूहिक विहाव के आयोजन सबो समाज बर अनुकरणीय : श्री भूपेश बघेल

रायपुर, मुख्यमंत्री श्री भूपेश बघेल ह कहिन के सबो समाज म सामूहिक विहाव के आयोजन ल बढ़ावा देहे जाना चाही। मुख्यमंत्री आज रायपुर के देवपुरी स्थित गोदड़ीवाला धाम म छत्तीसगढ़ जनरल सिन्धी प्रदेश पंचायत कोति ले आयोजित सामूहिक विवाह समारोह ल सम्बोधित करत रहिन। उमन कहिन के सिन्धी समाज एक समृद्ध समाज हे अऊ अइसन समाज कोति ले सामूहिक विवाह के आयोजन करना एक अच्छा उदाहरण अऊ अनुकरणीय काम हे। सबो समाज ल सामूहिक विवाह कार्यक्रम ल अइसनहे प्रोत्साहित करना चाही। अइसन आयोजन म समाज के प्रमुख मनखे मन के संगें-संग बड़ संख्या म नागरिक सामिल होथें अऊ समाज के सियान मन के आशीर्वाद नवदंपत्ति मन ल मिलथे। ये आशीर्वाद नवदंपत्ति मन के जीवन म सुख-शांति, खुसी अऊ सफलता लाथे। मुख्यमंत्री ह ए अवसर म परिणय सूत्र म बंधे नौ जोड़ा मन ल अपन आशीर्वाद दीन अऊ ऊंखर खुशहाल अऊ सुखमय जीवन के कामना करिन।
मुख्यमंत्री ह एखर पहिली संत बाबा गेलाराम के दरबार पहुंचके संत के मूर्ति उपर माल्यार्पण करिन अऊ प्रदेश के सुख-समृद्धि के कामना करिन। ए अवसर म विधायकद्वय श्री सत्यनारायण शर्मा अऊ श्री कुलदीप जुनेजा, शदाणी दरबार के संत श्री युधिष्ठिर लाल, पूर्व विधायक श्री श्रीचंद सुंदरानी, संत गेलाराम बाबा ट्रस्ट गोदड़ीवाला धाम के अम्मा मीरा देवी, ट्रस्ट के श्री राम खूबचंदानी संग सिन्धी पंचायत के बहुत अकन पदाधिकारी अऊ समाज के सदस्य बड़ संख्या म उपस्थित रहिन। सिन्धी पंचायत कोति ले मुख्यमंत्री ल मुकुट पहिरा के अऊ स्मृति चिन्ह भेंटकरके अभिनंदन करिन।
ए अवसर म जानकारी देहे गीस के श्री संत गेलाराम कोति ले 25 साल पहिली रायपुर के देवपुरी म गोदड़़ीवाला धाम के स्थापना करे गए रहिस। पाछू पंद्रा बछर ले इहां संत गेलाराम के जन्मदिन के अवसर म 12 फरवरी के दिन सामूहिक विवाह समारोह के आयोजन करे जात हे। अब तक करीबन 600 जोड़ा मन के विहाव गोदड़ीवाला धाम कोति ले कराये गए हे। ए धाम म एक डिस्पेंसरी के संचालन घलोक करे जात हे, जेमां रोज करीबन 250 ले 300 मरीज मन के इलाज करे जात हे। गोदड़ीवाला धाम ट्रस्ट कोति ले इहां उत्कृष्ट स्तर के प्राथमिक पाठशाला संचालित करे जात हे, जेमां तीर के ग्रामीण अऊ गरीब लइका मन बर निःशुल्क शिक्षा देहे जाथे। ए अवसर म सामूहिक जनेऊ अऊ मुंडन संस्कार के आयोजन घलव करे गीस अउ संगे-संग स्वास्थ्य शिविर के आयोजन घलोक करे गीस।

लउछरहा..