जमीन के छोटे तुकड़ा के बिक्री ले नसीब खान के बेटी के हो पाही बिहाव

रायपुर, राज्य शासन के 5 डिसमिल ले कम रकबा के भूखण्ड मन के खरीदी-बिक्री के रजिस्ट्री कराए के निर्णय के बाद राजनांदगांव जिला के ग्राम सिंघोला निवासी श्री नसीब खान ल पारिवारिक अऊ सामाजिक दायित्व ल पूरा करे म सुविधा मिलही। उमन मोतीपुर खार रामनगर राजनांदगांव स्थित दू अलग-अलग टुकड़ा म दू-दू डिसमिल के कुल 4 डिसमिल जमीन के दू भूखण्ड मन ल बेच के पारिवारिक जरूरत ल पूरा करिस।
श्री नसीब खान ह बताइस के अब ओ ल अपन बेटी के बिहाव करे म आसानी होही। श्री खान जमीन बेचे के बाद मिले पइसा ले मकान घलोक बनाना चाहत हे। श्री नसीब खान बर छत्तीसगढ़ सरकार के ये निर्णय बड़का राहत ले कम नइ हे। वो बताइस के जरूरत परे के बाद घलो ओ ह बहुत दिन ले मोतीपुर खार रामनगर स्थित अपन कुल 23 डिसमिल जमीन म ले दू-दू डिसमिल के दू छोटे-छोटे भूखण्ड मन ल बेंचे के उदीम करत रहिस। छत्‍तीसगढ़ शासन के जुन्ना नीति के मुताबिक पांच डिसमिल ले कम जमीन के रजिस्ट्री नइ होवत रहिस। ए कारण ओ ल अड़बड़ दिककत होवत रहिस।
मुख्यमंत्री श्री भूपेश बघेल के सियानी म छत्तीसगढ़ शासन कोति ले 29 दिसम्बर 2018 ले पांच डिसमिल ले कम के छोटे भूखण्ड मन के खरीदी-बिक्री म रोक हटाए के निर्णय ले ओ ल अपन पारिवारिक जिम्मेदारी निभाए म मदद मिलीस। जमीन सौदा अऊ बिक्री होए के बाद जमीन के रजिस्ट्री घलोक हो गीस। वो कहिस के राज्य शासन के ये निर्णय वोकर जइसे बहुत अकन जरूरतमंद मनखे मन बर मददगार बनके राहत पहुंचाही।

लउछरहा..