स्मार्ट घुरवा ले होही गांव मन के विकास – श्री भूपेश बघेल

रायपुर, मुख्यमंत्री श्री भूपेश बघेल आज जांजगीर-चांपा जिला के नगर पंचायत डभरा म आयोजित छत्तीसगढ़ झेरिया-धोबी-बरेठ समाज के राज्य स्तरीय युवक-युवती परिचय सम्मेलन म सामिल होइन। ए अवसर म उमन समाज कोति ले प्रकाशित स्मारिका के विमोचन करिन। मुख्यमंत्री ह मनखे मन के मांग म मंगल भवन निर्माण बर 15 लाख रूपिया के मंजूरी के घोषणा घलोक करिन।
मुख्यमंत्री ह सम्मेलन ल संबोधित करत कहिन के बरेठ समाज के मनखे परंपरागत व्यवसाय के संगें-संग खेती किसानी घलोक कुशलता ले करत हें। राज्य सरकार के योजना के तहत किसानी काम ल प्रोत्साहित करे जात रहा हे। घुरवा ल स्मार्ट बनाके गांव मन के विकास बर योजना चालू करे गए हे। पाछू बछर म केवल नगरी निकाय मन ल स्मार्ट बनाए के प्रयास करे गीस। घुरवा ल वैज्ञानिक तरीका ले तइयार करके गोबर गैस प्लाण्ट स्थापित करे जाही। एखर से मिलइया गोबर गैस ले खाना बनाए बर ईंधन मिलही अऊ किसानी बर उपजाऊ खाद घलोक मिलही।
कार्यक्रम ल चन्द्रपुर विधायक श्री रामकुमार यादव, समाज के पदाधिकारी श्री दीपक बरेठ ह घलोक संबोधित करिस। सम्मेलन म जिला पंचायत सदस्य श्रीमती तुलसी देवी साहू, डभरा नगर पंचायत के अध्यक्ष श्रीमती नीलू चन्द्रा, कलेक्टर श्री नीरज कुमार बनसोड़, पुलिस अधीक्षक श्रीमती पारूल माथुर, जिला पंचायत के पूर्व सदस्य श्रीमती रश्मि गबेल अऊ श्री दिनेश शर्मा संग बड़ संख्या म मनखे उपस्थित रहिन।

लउछरहा..