किसान खेती के उन्नत तकनीक अपनाके अपन आमदनी म बढ़ोतरी करव : मुख्यमंत्री भूपेश बघेल

सुराजी गांव के करिन विमोचन

बेमेतरा, मुख्यमंत्री श्री भूपेश बघेल ह आज जिला मुख्यालय बेमेतरा म आयोजित राज्य स्तरीय कृषि विकास अउ किसान कल्याण मेला म संघर के बेमेतरा जिला म फूडपार्क, शक्कर कारखाना के निर्माण, दुग्ध शीतलीकरण केन्द्र, उद्यानिकी कालेज अऊ बेमेतरा शहर बर बायपास रोड निर्माण के घोषणा करिन। मुख्यमंत्री ह बेमेतरा जिला बर 19 करोड़ 12 लाख रूपिया के निर्माण कार्य के लोकार्पण अउ भूमिपूजन करिस। एखर अलावा उमन हितग्राही मूलक योजना मन के अंतर्गत 15 लाख 86 हजार रूपिया के चेक अउ सामान वितरण करिन।




मुख्यमंत्री ह विशाल जनसमुदाय ल सम्बोधित करत कहिन के प्रदेश सरकार मजदूर अऊ किसान मन के सरकार ये। जब किसान खुशहाल होही त छत्तीसगढ़ घलोक खुशहाल रइही। ए अवसर म उमन सुराजी गांव योजना के शुभारम्भ करत एक पुस्तिका के विमोचन करिन। समारोह के अध्यक्षता गृह जेल अउ लोकनिर्माण मंत्री श्री ताम्रध्वज साहू ह करिन। मुख्यमंत्री ह कहिन के जनघोषणा पत्र म करे गए वादा के मुताबिक सरकार ह शपथ ग्रहण करतेच किसान मन के करजा माफ करिस हे। एखर से प्रदेश के 16 लाख किसान लाभान्वित होइन हे। सरकार कोति ले प्रदेश के 16 लाख ले जादा किसान मन के 6100 करोड़ रूपिया के अल्पकालीन कृषि ऋण माफ करे गीस। किसान मन कोति ले राष्ट्रीयकृत बैंक मन ले लेहे गे करीबन 5000 करोड़ रूपिया के अल्पकालीन कृषि ऋण घलोक माफ करे गीस। एखर अलावा 2500 रूपिया प्रति क्विंटल दर म किसान मन ले धान घलोक खरीदे गीस। प्रदेश सरकार ह कुसियार खरीदी म घलोक बोनस देवत हे। ये फैसला हमन किसान मन के हक म लेहे हवन। मुख्यमंत्री ह छत्तीसगढ़ के चार चिन्हारी नरवा, गरूवा, घुरूवा अउ बारी, – ऐला बचाना हे संगवारी, के संरक्षण अउ संवर्धन बर आम नागरिक मन ल आव्हान करिन। उमन कहिन के दिनों-दिन भू-जल स्तर नीचे जात हे। नरवा के संरक्षण ले भू-जल स्तर बने रइही। एकर उपयोग खेती किसानी बर घलोक करे जा सकही। स्मार्ट घुरवा बनाके कम्पोस्ट खाद के निर्माण ले कृषि के उत्पादन ल बढ़ाये जा सकत हे। अइसने मवेशी ठोहरियाए के जगा दइहान निर्माण करके जानवर मन बर पानी अउ चारा के व्यवस्था करे जाही। मुख्यमंत्री ह कहिन के गांव म मवेशी चरइया यादव समुदाय ल एखर देख रेख बर महात्मा गांधी नरेगा योजना ले पारिश्रमिक घलोक दहे जाही। मुख्यमंत्री ह किसान मन ले फसल के पैरा मन ल खेत म जलाए ले मना करिन उमन कहिन के एखर से धरती के उर्वरा शक्ति कम होथे। उमन इहां छत्तीसगढ़ के चार चिन्हारी नरवा, गरूवा, घुरवा अउ बारी, गांव ल बचाना हे संगवारी उपर केन्द्रित सुराजी गांव मार्गदर्शिका पुस्तिका के विमोचन करिन। ए पुस्तिका म प्रदेश के चार चिन्हारी के संरक्षण अउ संवर्धन बर सरकार ह जउन काम करे के प्रावधान करे हे तेकर उल्लेख हे।




गृहमंत्री श्री ताम्रध्वज साहू ह कहिन के बेमेतरा म आयोजित चार दिवसीय कृषि मेला के बहुत सुंदर अउ सफल आयोजन होवत हे। मुख्यमुत्री श्री भूपेश बघेल के नेतृत्व म सरकार ह प्रदेश के जनता के हित म दू महिना के कार्यकाल म बहुत अकन महत्वपूर्ण निर्णय लेहे हे। उमन कहिन के बेमेतरा म खुला जेल बनाये जाही।
कृषि मंत्री श्री रविन्द्र चौबे ह कहिन कि मुख्यमंत्री ह आज बेमेतरा ले सुराजी ग्राम योजना के शुभारम्भ करे हें। हमन जन घोषणा पत्र म वायदा करे रहेन के किसान मन के कर्जा माफ करबोन। 2500 रूपिया प्रति क्विंटल के दर ले धान बिसाबोन। ये वादा हमन अल्प समय म ही पूरा करके देखाए हवन। श्री चौबे ह कहिन के जिला म मछली पालन घलोक बड़े उद्योग बनने वाला हे। उमन किसान भाइ मन ल मेला घूम के, उन्नत तकनीक के जानकारी लेके अपन आय दुगुना करे के अपील करिन। कृषि मंत्री ह अधिकारी मन ल बहुतेच कमती समय म मेला के सबो तियारी पूरा करे बर बधाई दीन। विधायक श्री अशीष कुमार छाबड़ा ह कहिन के पहली पईत राजधानी ले बाहिर राज्य स्तरीय मेला के आयोजन बेमेतरा म होवत हे। ये एक कृषि प्रधान जिला ये, एखर सेती इहां कृषि आधारित उद्योग लगाय के मांग नागरिक मन कोति ले करे जात रहे हे। सरकार ह 6100 करोड़ रूपिया किसान मन के कर्जा माफ करे हे। विधायक ह बेमेतरा जिला के विकास बर मुख्यमंत्री ले बॉयपास सड़क फूड प्रोसेसिंग प्लांट के स्थापना, उद्यानिकी कालेज अउ कृषि आधारित उद्योग खोले के मांग घवव करिन।




अपर मुख्य सचिव अउ कृषि उत्पादन आयुक्त श्री के.डी.पी. राव ह कहिन कि बेमेतरा म आयोजित कृषि मेला ले किसान भाई खेती-किसानी के नवा-नवा तकनीक ले रूबरू होहीं। जेखर से ओ मन अपन आमदनी म बढ़ोतरी कर सकहीं। किसान के खुशहाली ह गांव के खुशहाली हे। ए अवसर म विधायक नवागढ़ श्री गुरूदयाल सिंह बंजारे, विधायक पंडरिया श्रीमती ममता चन्द्राकर अउ जिला पंचायत अध्यक्ष श्रीमती कविता साहू, संभागायुक्त दुर्ग श्री दिलीप वासनिकर, आई.जी. श्री रतन लाल डांगी, सचिव कृषि श्री हेमंत पहारे, कलेक्टर श्री महादेव कावरे, मंडी बोर्ड के प्रबंध संचालक श्री जन्मेजय महोबे, इंदिरागांधी कृषि विश्वविद्यालय रायपुर के कुलपति डॉ.एस.के पाटिल, कामधेनु विश्वविद्यालय दुर्ग के डॉ ए.पी.दक्षिणाकर, संचालक मछली पालन विभाग श्री व्ही.के. शुक्ला, संचालक उद्यानिकी डॉ. प्रभाकर सिंह, पुलिस अधीक्षक प्रशांत ठाकुर जिला पंचायत के सी.ई.ओ.प्रकाश कुमार सर्वे उपस्थित रहिन।



लउछरहा..