स्वास्थ्य मंत्री श्री टी.एस. सिंहदेव ह प्रदेश म स्वाइन फ्लू के स्थिति के करिन समीक्षा

  • सबो अस्पताल मन म दवई के बहुत स्टॉक रखे के निर्देश
  • स्वाइन फ्लू ले बचाव अउ रोकथाम बर सबो जिला मन म जागरूकता अभियान

रायपुर, छत्तीसगढ़ के लोक स्वास्थ्य अउ परिवार कल्याण मंत्री श्री टी.एस. सिंहदेव ह आज विधानसभा समिति कक्ष म विभागीय अधिकारी मन अऊ खांटी जानकार के बैठक लेके प्रदेश म स्वाइन फ्लू के स्थिति के समीक्षा करिन। उमन प्रदेश के सबो अस्पताल मन म दवई मन के बहुत स्टॉक रखे के निर्देश दीन। उमन अस्पताल मन म स्वाइन फ्लू के जांच के व्यवस्था करे के घलोक निर्देश दीन। स्वास्थ्य मंत्री ह स्वाइन फ्लू के लक्षण वाले मरीज मन के तुरंते उपचार करे ल कहिन। उमन संभावित मरीज मन के जांच रिपोट के अगोरा करे बिना तुरंते सावधानी बरतत ओ मन ल इलाज मुहइया कराये ल कहिन।




श्री सिंहदेव ह स्वाइन फ्लू ले बचाव अऊ रोकथाम बर सबो जिला मन म जन-जागरूकता अभियान संचालित करे के घलोक निर्देश दीन। उमन एडवाइजरी जारी करके स्वाइन फ्लू के लक्षण, बचाव अऊ रोकथाम के बारे म जादा ले जादा मनखे मन ल बताये ल कहिन। श्री सिंहदेव ह शासन कोति ले स्वाइन फ्लू के जांच अऊ इलाज बर करे गए व्यवस्था मन के बारे म घलोक मनखे मन ल जानकारी देहे ल कहिन। उमन बीमारी के समय रखे जाने वाला सावधानी मन अऊ आइसोलेशन के जरूरत के बारे म घलोक जागरूक करे के निर्देश दीन। स्वास्थ्य विभाग के अधिकारी मन ह बैठक म बताइन के सबो जिला मन के मुख्य स्वास्थ्य अउ चिकित्सा अधिकारी मन ल स्वाइन फ्लू ल लेके सतर्कता बरते के निर्देश देहे गे हे। बीमारी के प्रति जरूरी सावधानी अऊ इलाज के बारे म मनखे मन ल सरलग जागरूक करे जात हे। उमन बताइन के स्वाइन फ्लू के जांच शासकीय मेडिकल कॉलेज मन के माइक्रोबायोलॉजी विभाग अऊ जिला चिकित्सालय मन म करे जात हे। राज्य के सबो शासकीय मेडिकल कॉलेज, जिला चिकित्सालय अऊ सामुदायिक स्वास्थ्य केन्द्र मन म ओसेल्टामीवीर के दवई निःशुल्क देहे गए हे। आम नागरिक स्वाइन फ्लू के संबंध म जादा जानकारी बर निःशुल्क आरोग्य सेवा 104 म फोन करके जरूरी स्वास्थ्य परामर्श ले सकत हें।




बैठक म स्वास्थ्य विभाग के सचिव श्रीमती निहारिका बारिक सिंह, संचालक डॉ. प्रियंका शुक्ला, छत्तीसगढ़ मेडिकल सर्विसेस कार्पोरेशन के प्रबंध संचालक श्री निरंजन दास, पंडित जवाहरलाल नेहरू स्मृति चिकित्सा महाविद्यालय, रायपुर के डीन डॉ. आभा सिंह, डॉ. भीमराव अम्बेडकर स्मृति चिकित्सालय, रायपुर के अधीक्षक डॉ. विवेक चौधरी, महामारी अउ परियोजना निदेशक (एड्स) डॉ. आर.आर. साहनी अऊ अखिल भारतीय आयुर्विज्ञान संस्थान, रायपुर के निदेशक डॉ. नितिन एम. नागरकर संग बहुत अकन विशेषज्ञ मौजूद रहिन।



लउछरहा..