कौशिक हटगे, उसेण्डी सटगे, समझ आदिवासी मतदाता मन पटगे

लोकसभा चुनई के पहिली भाजपा संगठन म बड़का बदलाव, कौशिक ल हटाके विक्रम उसेण्डी ल बनाइस प्रदेश अध्यक्ष

धर्मेन्‍द्र निर्मल के सार समाचार, भाजपा के राष्टृीय अध्यक्ष अमित शाह ह अपन रायपुर दौरा के चोबिसे घण्टा के भीतर छत्तीसगढ़ के संगटन म बड़का बदलाव करे हे। उन मन धरमलाल कौशिक के जगा कांकेर के सांसद विक्रम उसेण्डी ल नवा प्रदेश अध्यक्ष बनाए हे। विधानसभा चुनई म अड़सठ सीट म करारी हार के बाद भाजपा संगठन म प्रदेश के अध्यक्ष ल हटाए के भारी भरकम दबाव रिहिसे। हालेके लोकसभा चुनई ल देखत कौशिक ल अउ मोहलत मिल जही अइसे अनमान रिहिसे फेर बिरस्पत के रायपुर के अपन डेढ़ घण्टा के दौरा म शाह अउ संगठन महामंत्री रामलाल ह प्रदेश भाजपा म उभरत गुटबाजी अउ कौशिक के नेतृत्व ल लेके नराजगी ल देखत ए फैसला करे हे।
लोकसभा चुनई के ठीक पहिली छत्तीसगढ़ संगठन म होए ए बदलाव ल लोगन आदिवासी बोट बैंक ल अपन कोति तीरे के उदीम ए अइसे मानत हे। दू महीना पहिली होए विधानसभा चुनई म बस्तर अउ सरगुजा मिलाके छब्बीस सीट होथे जेमा भाजपा सिरिफ एके सीट ल पाए रिहिसे। अइसे लागथे कि भाजपा ह विधानसभा चुनई पइत होए अतेक बड़ आदिवासी डबरा ल पाटना चाहत हे।

चटकारा:-
डरावल:- एकर टाएर टीव अब्बड़ पंचर होथे यार अब ए गाड़ी ल बदल के दूसर गााड़ी ले बर परही।
हेल्फर:- अरे गाड़ी ह खराब नइ होए हे भैया, टाएर टीव खराब हे। टाएर टीव ल बदल। पागा बलदे ले पगरइत के पगरइती नइ बदल जाय। कैसा कोदो आदमी हे यार ?

लउछरहा..