महिला अउ बाल विकास मंत्री ह दुर्ग जिला के बोरसी ले करिस वजन तिहार के शुभारंभ

दुर्ग, महिला अउ बाल विकास मंत्री श्रीमती अनिला भेंडि़या ह आज दुर्ग जिला के बोरसी स्थित आदर्श आंगनबाड़ी केन्द्र ले प्रदेशव्यापी वजन तिहार के शुभारंभ करिस। श्रीमती भेंडि़या ह खुद लइका मन के वजन लेके उंकर पोषण स्तर के जानकारी लीन अऊ सबो लइका मन ल चॉकलेट बांटिन। श्रीमती भेंडि़या ह आम जन ले वजन तिहार के समय निरधारित तारीक म आंगनबाड़ी केन्द्र मन म सबो लइका मन अऊ किशोरी बालिका मन के वजन कराये के अपील करिन।
श्रीमती भेंडि़या ह कहिन कि लइका मन म कुपोषण के स्तर के जांच कर ओ मन ल सुपोषित बनाए बर सबो आंगनबाड़ी केन्द्र मन म 20 जनवरी तक वजन तिहार मनाये जाही। ए दौरान गर्भवती माता अऊ किशोरी बालिका मन के स्वास्थ्य के घलोक जांच करे जाही। उमन बताइस के आंगनबाड़ी केन्द्र मन म लइका मन ल हफ्ता म एक दिन अण्डा देहे जाही। जऊन लइका अण्डा नइ खावय, ओ मन ल पौष्टिक फल दे जाही। अभी हाल म मुख्यमंत्री अमृत योजना के तहत लइका मन ल दूध घलोक देहे जात हे। एखर से लइका मन ल स्वस्थ्य अउ सुपोषित बनाए म मदद मिलथे। उमन किशोरी बालिका अउ गर्भवती माता मन ले बात करके ऊंखर खान-पान के संबंध म जानकारी लीन अऊ जरूरी सुझाव दीन। ए दौरान जिला के कलेक्टर श्री अंकित आनंद संग महिला अउ बाल विकास विभाग के अधिकारी अउ कर्मचारी उपस्थित रहिन।
हम आप ल बता देवन के कुपोषण के स्थिति जाने बर सबो आंगनबाड़ी केंद्र मन म हर साल वजन तिहार मनाये जाथे। ए दौरान निरधारित तारीक म शून्य ले 5 साल तक के लइका मन के वजन लेके ऑनलाईन सॉफ्टवेयर के माध्यम ले पोषण स्तर के पता लगाये जाथे। कम वजन वाले लइका मन ल चिन्हांकित करके ओ मन ल उचित पोषण आहार देके कुपोषण दूर करे के प्रयास करे गीस जाथे। ए साल ले ए अभियान म किशोरी बालिका मन के जांच ल घलोक सामिल करे गए हे। किशोरी बालिका ममन म एनीमिया के स्तर म सुधारे बर वजन तिहार के समय उंखर हीमोग्लोबिन जांच कराये जाही अऊ उंखर वजन अऊ ऊंचाई लेके बीएमआई (बॉडी मास इंडेक्स) निकाले जाही। एखर बर विभाग कोति ले स्वास्थ्य विभाग के सहयोग घलोक लेहे जाही। वजन तिहार के आयोजन तारीक म सबो आंगनबाड़ी केन्द्र संझा 5 बजे तक खुले रखे जाही। आंगनबाड़ी मन म दर्ज लइका मन के अलावा बाहिर ले आए लइका मन के वजन घलोक लेहे जाही अऊ निःशक्त लइका मन के पहिचान करे जाही।

लउछरहा..