राष्ट्रीय डेंगू दिवस के अवसर म जन जागरूकता रैली

नुक्कड़ नाटक के माध्यम ले डेंगू रोग के लक्षण अउ बचाव के दीस जानकारी

बलरामपुर, धमेन्‍द्र निर्मल के सार समाचार : राष्ट्रीय डेंगू दिवस के अवसर म मुख्य चिकित्सा अउ स्वास्थ्य अधिकारी डॉ. ज्ञानेश चैबे के अध्यक्षता म जन जागरूकता रैली शहर के मुख्य मार्ग म निकाले गईस अउ डेंगू रोग ले बचाव बर लोगल मन ल पाम्पलेट घलो बाँटे गइस। ए समे बर जिला चिकित्सालय बलरामपुर म रोगी मन ल नुक्कड़ नाटक के माध्यम ले डेंगू रोग के लक्षण अउ बचाव के जानकारी दिए गिस।



मुख्य चिकित्सा अउ स्वास्थ्य अधिकारी डॉ. ज्ञानेश चैबे हँ बताइन कि डेंगू एडीज मच्छर के चाबे ले होथय, ये मच्छर हँ दिनमान चाबथे। उन मन डेंगू ले बाँचे बर कूलर, पानी के टंकी, चिरई चिरगुन के पीए के पानी के बर्तन, फ्रीज के ट्रे, फूलदानी मन ल हर सप्ताह खाली करे अउ घाम म सूखो के उपयोग करे अउ घर के डेहरी, खिड़की मन म जाली अउ परदा लगाए बर कहिन। मुख्य चिकित्सा अउ स्वास्थ्य अधिकारी मन बताइन कि डेंगू रोग के जांच के सुविधा जिला के सबो सामुदायिक स्वास्थ्य केन्द्र मन म हावय अउ जिला चिकित्सालय बलरामपुर म डेंगू वार्ड घलो बनाए गे हावय। उन मन बताइन कि डेंगू दिवस के अवसर म जम्मो स्वास्थ्य केन्द्र मन म बैनर प्रदर्शन, पोस्टर बँटई अउ डेंगू के बचाव के जानकारी स्वास्थ्य केन्द्र मन म लोगन मन ल दिए गिस।



चटकारा
उंघावन दास:- भाई ! मोर तो रात भर मच्छर के मारे नींदे नइ परे हे भगवान जाने तैं कइसे सुतथस ते ।
भूखन दास:- अरे यार ! पंखा भर खड़खड़ – खड़खड़ बाजना चाही, ताहेन हम घोड़ा बेच के फसर -फसर सुत जथन। नींद परे अउ मरे कहिथे, तेकर पीछू मच्छर आवय चाहे मच्छर के बाप, कोनो माई के लाल के हिम्मत नइ हे कि भूखन ल जगा सकय।

लउछरहा..