मुख्यमंत्री ह दिव्यांग बॉडी बिल्डर एसराज सेंदरे ल दीन बैटरी चलित ट्रायसाइकल

रायपुर, मुख्यमंत्री श्री भूपेश बघेल ह आज जन चौपाल भेंट मुलाकात कार्यक्रम म मुख्यमंत्री निवास आए टिकरापारा रायपुर के दिव्यांग बॉडी बिल्डर श्री एसराज सेंदरे ल बैटरी चलित ट्रायसायकल प्रदान करिन। मुख्यमंत्री ह श्री एसराज सेंदरे ले आवेदन लेके उंखर से बातचीत करिन अऊ ट्रायसायकल देके उंखर मनोबल बढ़ाइन। दिव्यांग श्री सेंदरे ह बताइस कि ओ ह बचपन ले ही दुनों पैर ले दिव्यांग हे। श्री सेंदरे बैटरी चलित ट्रायसायकल मिले म खुशी जाहिर करत बताइस कि ओ ह अब अपन दुनों लइका मन ल स्कूल लाना ले जाना आसानी ले कर सकही अऊ कोनो स्वरोजगार घलोक करे के उदीम करही। श्री सेंदरे ह बताइस कि उंखर पत्नी घरेलू काम-काज करथे अऊ एकरे से उंखर घर चलत हे। ट्रायसायकल मिले ले घर के काम-काज म हाथ बटाही अऊ कोनो काम धंधा घलोक करही। दिव्यांग श्री सेंदरे ह बताइस कि ओ ह 17 साल के उमर ले बॉडी बिल्डिंग के प्रदर्शन मुम्बई, तमिलनाडु , कांकेर, भिलाई, दुर्ग, अंबिकापुर अऊ बेमेतरा म करे गे हे। ये प्रदर्शन म ओ ह पहला अऊ दूसरा स्थान घलोक मिले हे।