नगरीय प्रशासन मंत्री डॉ. शिव डहरिया के चिखली ले आरंग तक आभार रैली

रायपुर, नगरीय प्रशासन मंत्री डॉ. शिवकुमार डहरिया 15 जनवरी, मंगलवार के दिन रायपुर जिला, विकासखण्ड आरंग के कई ठन गांव मन म आयोजित आभार रैली म सामिल होइन। मंझनिया बारह बजे ग्राम चिखली ले आरंग तक आयोजित आभार रैली (रोड शो) म ऊंखर स्वागत बर जन सैलाब उमड़ परिस। लइका, सियान अऊ महिला मन के संग स्कूली छात्र-छात्रा मन ह घलोक मंत्री डॉ. डहरिया के उत्साह के संग स्वागत करिन। आभार रैली आरंग के बेसिक स्कूल प्रागंण म देर रात खतम होइस। आभार रैली के पहिली डॉ. डहरिया ह ग्राम जुनवानी म परम पूज्य गुरू बाबा घासीदास के सत्य के चिनहा जैतखाम के पूजा अर्चना करिन अऊ प्रदेशवासी मन के खुशी अऊ उन्नति बर आर्शीवाद मांगिन। आभार रैली ह गांव-गांव, गली-गली गुजरत करीब पचास किलोमीटर के सफर तय करिस। रोड शो म आस-पास के गांव मन के ग्रामीण घलोक सैकड़ों के संख्या म पहुंचिन अऊ उत्साह के संग अभिनंदन करिन। मंत्री बने के बाद डॉ. डहरिया के स्वागत पारंपरिक राउत नाचा दल, पंथी नृत्य दल, गाड़ा बाजा, सुआ नृत्य दल मन के संग बहुत अकन लोक कलाकार मन ह घलोक करिन। आभार रैली के बेरा म युवा मन ह बाईक रैली निकालिन अऊ जमके आतिशबाजी करिन।
रोड शो म साहू समाज, सतनामी समाज, कुर्मी समाज, निषाद समाज, यादव समाज, मरार समाज, अग्रवाल समाज, गुप्ता समाज, सेन समाज, लोधी समाज, साहनी समाज, विकासखण्ड कर्मचारी संघ, पंचायत सचिव संघ चतुर्थ श्रेणी कर्मचारी संघ, ब्लिडिंग मटेरियल एसोसिएशन, आंगनबाड़ी कार्यकर्ता संघ, रसोईया संघ, रजक समाज, महिला स्व सहायता समूह, मुस्लिम समाज,व्यापारी संघ, ब्राह्मण समाज,सिन्धी समाज, संग कई ठन सामाजिक, राजनैतिक, सांस्कृतिक अऊ आर्थिक संगठन अऊ संस्था मन कोति ले नगरीय प्रशासन मंत्री डॉ. शिव डहरिया के जगा-जगा फूल माला अऊ नाड़ू, केला, सेब के फल मन ले हार्दिक स्वागत करे गीस। ए अवसर म बहुत अकन जनप्रतिनिधि अऊ नागरिक बड़ संख्या म उपस्थित रहिन।

लउछरहा..