- दुर्ग के जिला स्तरीय युवा महोत्सव के अवसर म युवा मन के हौसला बढ़ाए बर पहुंचिन गृह मंत्री श्री ताम्रध्वज साहू
दुर्ग, जिला स्तरीय युवा महोत्सव के अवसर म कला मंदिर पहुंचे गृहमंत्री श्री ताम्रध्वज साहू ह कहिन कि छत्तीसगढ़ के युवा मन म असीम प्रतिभा हे। ये प्रतिभा ल आगू लाए अऊ ओला नवा ऊंचाइ देहे बर युवा महोत्सव के आयोजन के निर्णय सरकार ह लेहे हे। आज हमन देखेन के दुर्ग जिला के युवा मन ह अतका शानदार प्रदर्शन करिन। सांस्कृतिक गतिविधि मन म विविध क्षेत्र मन म ए युवा मन के शानदार प्रदर्शन हमन देखेन। युवा महोत्सव जइसे आयोजन मन के माध्यम ले युवा मन के प्रतिभा आगू आथे। ओ मन ल अपन प्रतिभा प्रदर्शन के नवा मंच मिलथे। युवा महोत्सव म व्यक्तित्व विकास बर बहुत अकन गतिविधि मन के आयोजन करे गीस। गृह मंत्री ह कहिन कि युवा महोत्सव जइसे आयोजन मन ले युवा मन ल न केवल प्रतिभा प्रदर्शित करे के मौका मिलथे, भलुक उंखर आत्मविश्वास घलोक बाढ़थे। ये कार्यक्रम ब्लॉक स्तर म होइस, फेर जिला स्तर म होइस। सब्बो युवा मन ल एखर माध्यम ले प्रतिभा प्रदर्शन के मंच मिलीस। आदिवासी महोत्सव के माध्यम ले छत्तीसगढ़ के समृद्ध संस्कृति के झलक देखे ल मिलीस। ये युवा मन बर घलोक दिलचस्प अनुभव होही कि हमर संस्कृति कतेक वैविध्य ले भरे हे। एला जानना महसूस करना गौरव भरे अनुभव हे। उमन कहिन कि अपन सांस्कृतिक धरोहर ल सहेजना ओला विकसित करना सबले अहम जिम्मेदारी हे।
मुख्यमंत्री श्री भूपेश बघेल के नेतृत्व म छत्तीसगढ़ सरकार ह ये दिशा म काम करे हे। अपन तिहार मन के अवसर म अवकाश घोषित करे गए हे। हमन हरेली मनाएन। अपन सांस्कृतिक अस्मिता ल सहेजे के दिशा म काम बहुत अहम होथे। श्री साहू ह कहिन कि जब अइसन आयोजन होथे त ये मा प्रदर्शन करइया अउ दर्शक दुनों के सांस्कृतिक बोध गहरा होथे। एकर जइसे आयोजन हमार मन मस्तिष्क म गहरा छाप छोड़ देथे। संस्कारित युवा पीढ़ी तियार करे के दिशा म ये बहुत अच्छा काम हे। गृह मंत्री ह ये बेरा म प्रतिभाशाली कलाकार युवक मन के सम्मान घलोक करिन अऊ उंखर हौसलाअफजाई घलोक करिन। ये ये बेरा म जिला पंचायत अध्यक्ष श्रीमती माया बेलचंदन अउ कलेक्टर श्री अंकित आनंद घलोक उपस्थित रहिन।
