फोकट म ’ई-गोल्डन’ कार्ड बनवाए बर चिरौरी

पांच लाख हर बछर स्वास्थ्य सुविधा के मिलही लाभ

अम्बिकापुर, धमेन्‍द्र निर्मल के सार समाचार:  सरगुजा जिला के मुख्य चिकित्सा अउ स्वास्थ्य अधिकारी डॉ पी.एस.सिसोदिया मन बताइन हे कि आयुष्मान योजना कोति ले लोगन मन ल एक बछर म 5 लाख रूपिया के स्वास्थ्य सुविधा उपलब्ध कराए जावत हावय। उन मन एहू बताइन हे कि ’आयुष्मान योजना’ के लाभ लेहे बर परिवार के हरेक सदस्य के गोल्डन कार्ड बनाना जरूरी हे। अस्पताल म भर्ती होए म तुरते गोल्डल कार्ड सक्रिय करे के दवाब के बीच अब्बड़ बेरा खुवार होथे। ए समस्या ले बाँचे बर पंजीकृत सब्बो सरकारी अउ निजी अस्पताल मन म गोल्डन कार्ड सक्रिय करे जावत हावय। जिला म निजी अउ शासकीय अस्पताल मन ल मिलाकेे 50 चिकित्सकीय संस्थान हावय, अब एमा लगभग इन जम्मो संस्थान मन म हितग्राही मन के ई-गोल्डन कार्ड बनाए जावत हावय।



जिला म कुल 2 लाख 10 हजार 731 कार्डधारी परिवार हेवय, जबकि जनसंख्या लगभग 9 लाख 67 हजार हे, विभाग ह 9 लाख 67 हजार गोल्डन कार्ड जारी करे के लक्ष्य निर्धारित करे हे। एकर बर हितग्राही मन ल आधार कार्ड, स्मार्ट कार्ड, राशन कार्ड आदि नइ तो अउ कोनो भी किसम के सरकार डाहर ले वैधानिक कागज पत्तर संग म लाने बर कहे गे हावय, जेकर आधार म गोल्डन कार्ड जारी करे जा सकय।



आयुष्मान योजना के लाभ लेहे बर गोल्डन कार्ड सक्रिय करे बर परथे। गोल्डन कार्डधारी लोगन ल सबो पंजीकृत अस्पताल मन म सुविधा मिलही, हितग्राही ह सवाँगे जाके आसानी से कार्ड बनवा सकत हे। सरगुजा जिला म आयुष्मान भारत – प्रधानमंत्री जन आरोग्य योजना अउ मुख्यमंत्री स्वास्थ्य बीमा योजना अन्तर्गत जिला के चिकित्सालय मन ल फोकट म गोल्डन कार्ड ई- कार्ड अउ चिकित्सा सुविधा बर पंजीकृत करे गे हवय। चयनित संस्था मन म सबो सरकारी स्वास्थ्य केन्द्र अउ जिला चिकित्सालय संघेरे गे हावय।


चटकारा
बिलई:- वो जगा का भीड़ लगे हे अउ सब काय चोरबीर -चोरबीर करत हे ?
बनबिलवा :- उही मुसुवा मन सब धरना प्रदर्शन करत हावय नारा बोलाावत हे ”स्मार्ट कार्ड रोवत हे । इलााज कहाँ होवत हे ।”
बिलई:- बने हे, चल जाववं उही कोति दू चार ठन मुसुवा मन ल छपक लेथवं , ताहेन तीरथ तो जाबेच करहूँ।




लउछरहा..