- छत्तीसगढ़ म राष्ट्रीय पहल एकीकृत शिक्षण प्रशिक्षण कार्यक्रम ’निष्ठा’ होइस सुरू
- स्कूल शिक्षा मंत्री ह करिस शुभारंभ
रायपुर, स्कूल शिक्षा मंत्री डॉ. प्रेमसाय सिंह टेकाम ह कहिन कि लइका मन म शैक्षिक नेतृत्व क्षमता अऊ वैज्ञानिक सोच विकसित करे जाय। लइका मन ल किताबी ज्ञान के संग व्यवहारिक ज्ञान देना घलोक जरूरी हे। लइका मन ल पूरा शिक्षा देहे के जरूरत हे। एखर से लइका मन के बौद्धिक विकास होही। डॉ.टेकाम आज राजधानी रायपुर म राष्ट्रीय पहल के एकीकृत शिक्षण प्रशिक्षण कार्यक्रम ’निष्ठा’ के शुभारंभ अवसर म उपस्थित भाग लेवईया मन ल सम्बोधित करत रहिन। छत्तीसगढ़ म निष्ठा कार्यक्रम के अंतर्गत प्रदेश के सबो प्राथमिक अऊ उच्च प्राथमिक विद्यालय मन के डेढ़ लाख ले जादा शिक्षक मन ल प्रशिक्षण दे जाही। प्रशिक्षण सत्र के शुभारंभ राज्यगीत ले करे गीस। ये सात दिवसीय प्रशिक्षण कार्यक्रम 10 जनवरी तक संचालित होही। निष्ठा के संग शिक्षक दक्षता अऊ संवर्धन कार्यक्रम के घलोक प्रशिक्षण दे जाही। एखर से शासकीय विद्यालय मन के शिक्षक मन के व्यावसायिक दक्षता मन के विकास होही।
ये बेरा म राष्ट्रीय शैक्षिक अनुसंधान अऊ प्रशिक्षण परिषद् के संचालक प्रोफेसर ऋषिकेश देवसेनापति, निष्ठा कार्यक्रम के नेशनल कॉर्डिनेटर प्रोफेसर रंजना अरोरा, राष्ट्रीय शैक्षिक अनुसंधान अऊ प्रशिक्षण परिषद् के 15 ले जादा विशेषज्ञ, राज्य शैक्षिक अनुसंधान अऊ प्रशिक्षण परिषद् के अपर संचालक डॉ. सुनिता जैन, संयुक्त संचालक डॉ. योगेश शिवहरे, राज्य समन्वयक श्री संजय गुहे, श्री ए.के.सारास्वत, श्री नितिन तालुकदार, श्री हेमंत साव, श्री प्रशांत पाण्डेय, श्री सुनील मिश्रा, श्री बी.रघ्घु, श्री व्ही.के.तिवारी संग कार्यक्रम के प्रभारी उपस्थित रहिन।
