रायपुर के महिला मन ह देखाइन खो-खो अऊ कबड्डी खेल म दम
रायपुर, राज्य स्तरीय युवा महोत्सव म युवा मन के संगें-संग सियान मन ह घलोक अपन हुनर देखाइन। उमन अपन हुनर ले मैदान म उपस्थित खेल प्रेमी मन ल घलोक दांत तरि अंगरी दबा बर विवश कर दीन। ए सियान मन खेल म युवा मन जइसे उत्साह अऊ हुनर म उस्तादी के झलक देखे ल मिलीस। ऊंखर खेल ले युवा मन ल खेल के गुण घलोक सीखे ल मिलिस। राजधानी रायपुर के पंडित रविशंकर शुक्ल विश्वविद्यालय वाले खेल परिसर म 40 साल ले जादा आयु के महिला वर्ग के खो-खो अऊ कबड्डी के खेल प्रतियोगिता म रायपुर जिला के टीम विजेता रहिस।
महिला मन के 40 ले जादा आयु वर्ग के खो-खो प्रतियोगिता के फायनल मुकाबला रोमांचक रहिस। रायपुर अऊ कांकेर जिला के टीम मन के बीच कांटा के टक्कर देखे ल मिलीस। रायपुर के टीम ह कांकेर ल एक प्वाइंट ले हराके विजेता के खिताब हासिल करिस। रायपुर टीम के खिलाड़ी शकुंतला ह सबले जादा साढ़े चार मिनट तक खेल ल खेलिस। खो-खो के प्रतियोगिता म महासमुंद के टीम ह तीसर स्थान प्राप्त करिस।
महिला मन के 40 ले जादा आयु वर्ग के ही कबड्डी के प्रतियोगिता म फायनल मुकाबला रायपुर अऊ कबीरधाम जिला के बीच होइस। रायपुर जिला के टीम ह कबीरधाम जिला के टीम ल 37 के मुकाबला 15 अंक हासिल करके 22 अंक के अंतर ले प्रतियोगिता के खिताब हासिल करिस। प्रतियोगिता म कबीरधाम जिला के टीम उप विजेता रहिस अऊ बलौदाबाजार के टीम ह तीसर स्थान हासिल करिस।
