रायपुर, युवा मन के बीच गेड़ी दौड़ के जबरदस्त आकर्षण दिखिस। पारंपरिक खेल मन म खो-खो, कबड्डी के संग गेड़ी दौड़ म घलोक युवा मन ह उत्साह के संग हिस्सा लीन। गेड़ी दौड़ म कोण्डागांव, कबीरधाम अऊ मुंगेली के युवा मन ह परचम लहराइन। गेड़ी दौड़ म कुल 23 युवा मन ह भाग लीन। छालीवुड के चरित्र अभिनेता श्री मनमोहन सिंह ठाकुर, समाजसेवी श्री लीलाधर साहू अउर श्री चंद्रशेखर चकोर निर्णायक के भूमिका निभाइन।
युवा महोत्सव म पंडित रविशंकर शुक्ल विश्वविद्यालय वाले खेल परिसर म आज गेड़ी दौड़ प्रतियोगिता म 15 ले 40 आयु वर्ग म कोंडागांव जिला के श्री रामलाल मरकाम, इही आयु वर्ग के महिला वर्ग म कु. माधवी ध्रुव अऊ 40 ले जादा आयु वर्ग म कबीरधाम जिला के श्री पूनाराम पनागर पहिली स्थान हासिल करे म कामयाब रहिस। गेड़ी दौड़ प्रतियोगिता म 15-40 आयु वर्ग म मुंगेली जिला के श्री राकेश ध्रुव दूसर स्थान म अऊ कबीरधाम जिला के पुनेश धुर्वे तीसर स्थान म रहिस। अइसनहे बालिका वर्ग (15-40) म राजनांदगांव जिला के कु. रेणुका वर्मा दूसर स्थान म अऊ बलौदाबाजार जिला के कु. भारती साहू तीसर स्थान म रहिस। एखर अलावा 40 ले जादा आयु वर्ग म धमतरी जिला के श्री बाला राम ध्रुव अऊ बलौदाबाजार जिला के श्री धर्मेन्द्र वर्मा तीसरा स्थान प्राप्त करे म सफल रहिस।
