उद्योग मंत्री श्री लखमा ह कृषि प्रशासनिक भवन के करिन लोकार्पण

कृषि विज्ञान केन्द्र के पुस्तक के करिन विमोचन

नारायणपुर, उद्योग अउ आबकारी मंत्री श्री कवासी लखमा ह नारायणपुर जिला मुख्यालय के तीर ग्राम केरलापाल कृषि विज्ञान केन्द्र म प्रशासनिक भवन अउ गोदाम भवन के लोकार्पण करिन। ए अवसर म क्षेत्रीय विधायक श्री चंदन कश्यप, इंदिरा गांधी कृषि महाविद्यालय के कुलपति श्री एस.के. पाटिल, कलेक्टर श्री पदुम सिंह एल्मा संग कृषि विभाग अउ आन विभाग मन के जिला स्तरीय अधिकारी-कर्मचारी उपस्थित रहिन। मंत्री श्री लखमा ह प्रशासनिक भवन बर कृषि विभाग के अधिकारी अउ कर्मचारी मन ल बधाई दीन। उमन कहिन के जिला के किसान मन बर ए नवा भवन म कृषि प्रशिक्षण कक्ष घलोक बनाये गए हे। जेमां किसान मन ल आधुनिक कृषि अऊ पाम्परिक खेती-किसानी के बारे म प्रशिक्षण देहे जाही। ये प्रशासनिक भवन 1 करोड़ 50 लाख रूपिया के लागत ले बन के तियार होय हे। श्री लखमा ह विभाग अऊ कृषि विद्यालय मन कोति ले लगाये गये स्टॉल मन के घलोक अवलोकन करिन। मंत्री ह स्टॉल अवलोकन के समय स्टॉल म प्रदर्शन बर रखे केक ल महिला कर्मी मन ल खवाइन।
एखर अवसर म उद्योग मंत्री श्री कवासी लखमा ह कृषि विज्ञान केन्द्र नारायणपुर के केचुआ (गेंगरूआ) खाद उपर आधारित पुस्तक के घलोक विमोचन करिन। ए पुस्तक म केचुआ खाद ले लाभ, केचुआ खाद के रासायनिक संरचना, कृषि के टिकाऊपन म केचुआ के योगदान, क्यारी मन ले केचुआ खाद सकेलना अऊ केचुआ खाद बनाए के विधि मन के बारे म सचित्र रूप ले बताये गए हे।

लउछरहा..