घरेलू बिजली बिल आधा करे के फैसला : उपभोक्ता मन ल समय म पूरा बिल पटाए म घलोक होवत हे आसानी

राजनांदगांव, प्रदेश सरकार कोति ले सामान्य घरेलू बिजली बिल ल आधा करे ले उपभोक्ता मन ल बिक्‍कट राहत मिले हे। बिजली बिल आधा होए के सेती पूरा भुगतान करे म घलोक बहुत आसानी होवत हे। पहिली खपत के पूरा बिल आत रहिस, त कई उपभोक्ता मन ल बेरा म पइसा नइ होए के सेती ले उधार लेके बिजली बिल पटाना परत रहिस। सामान्य घरेलू बिजली बिल आधा करे ले आम उपभोक्ता बहुत खुश हे। पइसा बांचे ले छोटे-मोटे घरेलू जरूरत घलोक पूरा होवत हे।

राजनांदगांव विकासखंड के भेंड़ीकला के श्री नंदलाल देवांगन, मुढ़ीपार-नवागांव के श्री किशनलाल साहू, श्री टहलदास साहू ल बिजली बिल पटाए बर अब आस पड़ोस ले उधार तको नइ ले ल परय। भेंड़ीकला के श्री नंदलाल देवांगन छोटे किसान हे। वो ह बताइस कि पहिली 80 रूपिया तक बिजली बिल आत रहिस। पाछू दू महिना ले मात्र 40 रूपिया के बिजली बिल आवत हे। बिजली बिल आधा होए ले खुश श्री नंदलाल देवांगन ह कहिन कि प्रदेश के भूपेश सरकार ह बिजली के मामला म मनखे मन ल राहत दिए हें। उमन एखर बर मुख्यमंत्री श्री भूपेश बघेल ल धन्यवाद घलोक दीन।

बने होगे, कई घांव बिजली बिल पटाए बर पइसा नइ राहय, उधारी ले बर परे-
मुढ़ीपार-नवागांव के किसान श्री किशनलाल साहू अउ श्री टहलदास साहू खेत म नांगर चलात मिल गें। उमन ल पूछे म विश्वास के संग खुश होके उमन बताइन कि होगे, होगे, बिजली बिल आधा होगे। श्री किशलाल साहू ह कहिस कि बने होगे, कई घांव बिजली बिल पटाए बर पइसा नइ राहय, उधारी लेके बिजली बिल पटाए बर परे।

श्री किशनलाल साहू ह बताइस कि दू महिना ले 180 रूपिया बिजली बिल आवत हे। पहिली साढ़े 300 ले 400 रूपिया तक बिजली बिल आत रहिस। श्री टहलदास साहू के घर के बिजली बिल घलोक आधा हो गए हे। दू महीना ले हर महिना मात्र 110 रूपिया के बिजली बिल आवत हे। दुनों किसान मन ह प्रदेश सरकार के 400 यूनिट तक घरेलू बिजली बिल आधा करे के निर्णय ल बढ़िया बताइन। किसान मन ह बताइन कि बिजली बिल के बचत राशि ले छोटे-छोटे घरेलू जरूरत पूरा होवत हे।

राजनांदगांव जिला म दू लाख 65 हजार ले जादा घरेलू उपभोक्ता मन ल मिलत हे फायदा-
प्रदेश सरकार के फैसला ले राजनांदगांव जिला के दू लाख 65 हजार 665 घरेलू कनेक्शन धारी उपभोक्ता मन ल फायदा मिलत हे। दू महीना म ए उपभोक्ता मन ल 10 करोड़ 72 लाख 26 हजार 278 रूपिया के छूट दिए गए हे।

लउछरहा..