कलेक्टर ह गोठान विस्तार काम म लपरवाही बरते म दू अधिकारी मन ल करिस निलंबित

बिलासपुर, कलेक्टर डॉ.संजय अलंग ह आज नरवा, गरूवा, घुरूवा अऊ बाड़ी (एनजीजीबी) के विस्तार काम मन म लपरवाही बरते म दू अधिकारी मन ल निलंबित कर दीस। कलेक्टर ह ग्रामीण कृषि विस्तार अधिकारी ओ. पी. अवस्थी अऊ पशु चिकित्सा क्षेत्र अधिकारी वीर विजय रात्रे ल काम म लपरवाही अऊ रूचि नइ लेहे म तुरंते प्रभाव ले निलंबित करे के निर्देश दीन। डॉ.अलंग आज नरवा, गरूवा, घुरूवा, बाड़ी अंतर्गत चलत विस्तार काम मन के जायजा लेहे बिल्हा अऊ मस्तूरी ब्लाक के कई गांव मन म पहुंचे रहिन। कलेक्टर जब मस्तूरी ब्लाक के पाराघाट गांव के गोठान के निरीक्षण करे ल पहुंचिन त उहां पाइन के अधिकारी गोठान विस्तार के काम मन म रूचि नइ लेवत हें।

कलेक्टर ल जानकारी मिलीस के ग्रामीण कृषि विस्तार अधिकारी ओ. पी. अवस्थी मुख्यालय म नइ रहंय। ओ ह किसान मन ले सम्पर्क तको नइ करयं अऊ शासन के योजना मन के जानकारी किसान मन तक तको नइ पहुंचावंय। गोठान के बारे म घलोक वो ह गांव वाले मन ल जरूरी जानकारी देत नइ रहिस। एखर अलावा कलेक्टर ह पाइस के पाराघाट के गोठान प्रभारी अऊ पशु चिकित्सा क्षेत्र अधिकारी वीर विजय रात्रे गोठान के विस्तार काम मन म रूचि नइ लेवत हे। ओ ह गोठान समिति के बैठक मन म तको उपस्थित नइ रहत रहिस, संगेच गांव वाले मन ले संपर्क तको नइ करत रहिस। कलेक्टर ह ओ दुनों अधिकारी मन ल गोठान के विस्तार काम म रूचि नइ लेहे अऊ लपरवाही बरते म तुरंते प्रभाव ले निलंबित करे के निर्देश देहे हें। कलेक्टर डॉ.अलंग ह मस्तूरी जनपद सीईओ ल दू दिन के अंदर गोठान के काम पूरा कराए के निर्देश देहे हें।

एखर पहिली कलेक्टर डॉ.संजय अलंग ह बिल्हा ब्लाक के ग्राम हथनी, चुराघाट, उड़नताल अऊ कनेरी म गोठान काम मन के निरीक्षण करिन। उमन उहां गांव वाले मन के संग चौपाल लगाके गोठान म चर्चा करिन। गांव वाले मन ह बताइन के गोठान बन जाय ले ओ मन ल बड़ आसानी होही। अब पशु ऊंखर खेत मन के फसल ल नुकसान नइ पहुंचायं, संगे च गांवेच म कई परकार के रोजगार मिल सकही। कलेक्टर ह उहां मौजूद अधिकारी मन ल हथनी गांव म गोठान के बगल म तालाब गहरीकरण, नाला गहरीकरण अऊ गोठान के आगू नवा तरिया के निर्माण के निर्देश दीन। उमन उड़नताल गोठान के बगल म मनरेगा ले तालाब के ट्रीटमेंट करे के निर्देश तको दीन।

निरीक्षण के बेरा म संयुक्त संचालक पशु चिकित्सा डॉ. से. के. पाण्डेय, उप संचालक उद्यानिकी श्री राम जी चतुर्वेदी, उप संचालक पंचायत श्री जे. पी. शुक्ला अउर ब्लाक स्तरीय अधिकारी मौजूद रहिन।

लउछरहा..