- श्री बघेल के अध्यक्षता म राज्य वन्य जीव बोर्ड के बैठक पूरा
- जंगल मन म वन्य प्राणी मन के भोजन-पानी बर अच्छा प्रबंध के निर्देश
रायपुर, मुख्यमंत्री श्री भूपेश बघेल के अध्यक्षता म आज इहां ऊंखर निवास कार्यालय म छत्तीसगढ़ राज्य वन्य जीव बोर्ड के 11वां बैठक म कई ठन विषय मन उपर चर्चा करत कई महत्वपूर्ण निर्णय लेहे गीस। बैठक म प्रदेश के कोरिया जिला के अंतर्गत गुरू घासीदास राष्ट्रीय उद्यान ल टाइगर रिजर्व घोषित करे के निर्णय ले गीस। अभी हाल म प्रदेश म तीन अचानकमार टाइगर रिजर्व, उदन्ती-सीतानदी टाइगर रिजर्व अऊ इन्द्रावती टाइगर रिजर्व हे। एला मिलाके अब चार टाइगर रिजर्व हो जाही। संगेच लेमरू हाथी रिजर्व गठन के अधिसूचना जारी होए के जानकारी दिए गीस।
लेमरू हाथी रिजर्व के गठन कोरबा, रायगढ़ अऊ सरगुजा जिला के कोरबा, कटघोरा, धरमजयगढ़ अऊ सरगुजा वनमण्डल के वन क्षेत्र ल मिलाके करे जावत हे। एकर कुल क्षेत्रफल एक हजार 995 वर्ग किलोमीटर हे। मुख्यमंत्री ह बैठक म प्रदेश के जंगल मन म वन्य प्राणी मन बर जल स्रोत मन ल विकसित करे अऊ फलदार अऊ साग भाजी के, नारवाले साग भाजी के बीज मन के छिड़काव करे, बांस, केला के प्लांटेशन के निर्देश दीन ताकि वन्य प्राणी मन ल भोजन अऊ चारा बर एती-ओती भटकना झन परय। उमन नरवा विकास योजना के तहत नाला मन ल पुनर्जीवित करे के संगें-संग वनग्राम मन म बड़े-बड़े तालाब के निर्माण करे बर घलोक निर्देशित करिन।
बैठक म रायगढ़ जिला के अंतर्गत गोमर्डा अभ्यारण्य के ग्राम कनकबीरा म पुलिस चौकी के स्थापना, छत्तीसगढ़ के राजकीय पशु वन भैंसा अऊ राजकीय पक्षी पहाड़ी मैना के शुभंकर अऊ गिद्ध मन के संरक्षण बर कार्ययोजना के संबंध म चर्चा करे गीस। राज्य म अचानकमार टायगर रिजर्व, गुरू घासीदास राष्ट्रीय उद्यान अऊ सरगुजा जिला के मैनपाट म गिद्ध मन के पांच प्रजाती पाए जाथे। एखर अलावा बलरामपुर वन मंडल स्थित सेमरसोत अभ्यारण्य म बुद्धिडीह अऊ डुमरखोरिखा-सकेतवा जलाशय बर 4.67 हेक्टेयर वनभूमि के व्यपवर्तन, जशपुर जिला के अंतर्गत लोटाडांड गायलुंगा ले रेंगले तक वन क्षेत्र म जुन्ना सड़क के मरम्मत अऊ मजबूतीकरण अऊ भोरमदेव अभ्यारण्य के मार्ग के उन्नयन अऊ चौड़ीकरण विषय मन उपर घलोक चर्चा होइस। बैठक म बाघ मन के संख्या म बढ़ोतरी अऊ बाघ मन के सुरक्षा बर रेडियो कॉलरिंग व्यवस्था अऊ बारनावापारा अभ्यारण्य ले चीतल मन के जादा संख्या ल गुरू घासी दास राष्ट्रीय उद्यान अऊ उदंती-सीतानदी टायगर रिजर्व म पुनर्स्थापित करे के संबंध म घलोक चर्चा करे गीस।
ये बेरा म वन मंत्री श्री मोहम्मद अकबर, कृषि अऊ पशुपालन मंत्री श्री रविन्द्र चौबे, विधायकगण श्री खेलसाय सिंह, श्री देवव्रत सिंह, श्री शिशुपाल सोरी, अकतहा मुख्य सचिव श्री अमिताभ जैन, प्रमुख सचिव वन श्री मनोज कुमार पिंगुआ, प्रधान मुख्य वन संरक्षक श्री राकेश चतुर्वेदी, प्रधान मुख्य वन संरक्षक (वन्य प्राणी) श्री अतुल कुमार शुक्ल संग बोर्ड के सदस्य अऊ संबंधित विभागीय अधिकारी उपस्थित रहिन।
