शिक्षा म आगू बढ़े बर चाही जिद्द अउ जिज्ञासा

हुसियार अउ गुनी पढ़इया मन के सम्मान समारोह संपन्न

जांजगीर-चांपा, धमेन्‍द्र निर्मल के सार समाचार, शिक्षा के क्षेत्र म आगू बढ़े बर लइका मन म जिद्द अउ विषय के प्रति जिज्ञासा होना चाही, तभे सपना ल साकार करे जा सकत हे। कलेक्टर श्री नीरज कुमार बनसोड़ ह आज जिला पंचायत परिसर स्थित जुन्ना लाईवलीहुड कालेज के सभाकक्ष म माध्यमिक शिक्षा मंडल डाहर ले आयोजित कक्षा 10वीं एवं 12वीं बोर्ड परीक्षा के मेरिट म पास बुघ्दिमान पढ़इया मन बर आयोजित सम्मान समारोह ल संबोधित करत रिहिसे। कलेक्टर श्री बनसोड़ ह हुसियार पढ़इया लइका मन ल अपन बधाई अउ शुभकामना देवत कहिन कि शिक्षेच ह एक अइसन माध्यम हे, जेकर ले ऊंच ले ऊंच पद पाए जा सकत हे। उन मन कहिन कि पढ़इया लिखइया लइाका मन ल आगू बढ़े बर लक्ष्य निर्धारित करके मेहनत अउ लगन के संग पढ़ई करना चाही। अइसन पढ़इया मन ल आगू बढ़े बर कोनो नइ रोक पावय, जेन विषय के प्रति बारिक जिज्ञासा अउ जाने के जिद््द ले के आगू बढ़ही, सफलता उन्करे कदम चुमही। शिखर योजना के तहत आवासीय शिक्षा दिये जावत हे। शिखर योजना के तहत कक्षा 10वीं बोर्ड परीक्षा में 8 अउ आकांक्षा योजना के तहत कक्षा 12वीं बोर्ड परीक्षा में 9 झिन पढ़इया मन मेरिट म उत्तीर्ण हो के जिले ल गौरवान्वित करे हवयं।



उन मन कहिन कि अवइया शिक्षा बछर म प्रतियोगी परीक्षा मन के तियारी बर कैरियर गाईडेन्स के संचालन करे जाही। ए बेरा म कलेक्टर श्री बनसोड़ ह पढ़इया मन संग अपन अनुभो ल घलो साँझर -मिंझर करिन। चेतलग अउ हुसियार पढ़इया लइका मन के सम्मान समारोह म जांजगीर अउ सक्ती के जिला शिक्षा अधिकारी, अभिभावकगण, शिक्षक-शिक्षिका मन अउ अबड़ झन पढ़इया नोनी बाबू मन संघरे रिहिन हे।



उल्लेखनीय हे कि 12वीं के बोर्ड परीक्षा म स्वामी विवेकानंद हायर सेकेण्डरी स्कूल करनौद जांजगीर के पढ़इया श्री अभिषेक कुमार डडसेना ह राज्य स्तर म छठवां स्थान अउ 10वीं बोर्ड परीक्षा म लायंस इंग्लिश मीडियम हाई स्कूल चांपा जांजगीर के छात्रा कुमारी सृष्टि गौर ह राज्य स्तर म आठवां अउ सरस्वती शिशु मंदिर हाई स्कूल चन्द्रपुर के छात्रा कुमारी प्रियंका सिदार ह राज्य स्तर म दसवां स्थान प्राप्त कर के जिला ल गौरवान्वित करे हवय। इही तरा कक्षा 12वीं बोर्ड परीक्षा म 16 अउ 10वीं बोर्ड परीक्षा म 12 झन पढ़इया मन जिला म दूसरा ले दसवां स्थान प्राप्त करे हे। इही कड़ी म जिला प्रशासन डाहर ले हुसियार लइका ल गुणवत्ता युक्त शिक्षा उपलब्ध कराये के उद्देश्य ले संचालित शिखर अउ आकांक्षा योजना के तहत 17 झन पढ़इया मन मेरिट म उत्तीर्ण होए हे।


चटकारा
बनचुकरू:- आज तैं पास होके हमर नाक ल उँच कर दिएस बेटा, बड़ खुसी लागत हे रे।
नान्चुक:- नाक ल उँच तो मैं कर देंव कका, फेर ए नाक ल तैं बचा के राखबे तब तो काम के, कि भइगे अइसनेहे कहि भर के भुलियार देबे।

लउछरहा..