भाजपा के गणित ले काग्रेस के घोसना उड़ा गे

जेटली के हांका, राहुल के पइसा देहे के योजना सिरिफ धोखा ये

कांग्रेस के सालाना 72 हज़ार रुपिया देहे के घोषणा उपर वित्त मंत्री अरुण जेटली के कहिना हे के कांग्रेस ह 70 साल ले जतना धोखा देश ल देहे हे, ओतका कोनो दूसर दल ह नइ देहे हे। उमन प्रेस कॉन्फ़्रेंस म कांग्रेस अध्यक्ष राहुल गाँधी के ये योजना ल धोखा देहे वाला योजना बताये हें।
उंखर बताती कांग्रेस के इतिहास झूठ बोले के रहे हे, 2008 म कांग्रेस ह 70 हजार करोड़ रुपिया के करजा माफ़ करे के वादा करे रहिस फेर सिरिफ 52 हजार करोड़ के करजा ही माफ़ करिस। बाद म कैग के रिपोट ले ख़ुलासा होइस के एकर फायदा जादातर दिल्ली के बिपारी मन ल मिलीस। पूर्व प्रधानमंत्री इंदिरा गाँधी 1971 म ग़रीबी हटाओ के नारा लगा के चुनाव जीते रहिस फेर उमन ग़रीबी हटाए बर कुछु नई करिन।
अरूण जेटली ह कहिन के मोदी सरकार ह अभी तको ग़रीब मन बर करीबन 1लाख ( 1,06,800) रुपिया के सालाना खरचा करत हे त कांग्रेस के ये 72 हजार सालाना कोन सा मार बड़े ये। जेटली ह कहिस के कांग्रेस ह किसान मन संग तको करजा माफ़ी म धोखा करे हे अऊ अपन वादा के मुताबिक़ करजा माफ़ नइ करे ये।
वित्त मंत्री के बताती मोदी सरकार ह खाद्य, उर्वरक, किसान अऊ आयुष्मान संग कई कल्याणकारी योजना मन उपर म भारत बर 5.34 लाख करोड़ रुपिया के सालाना खरचा करे हे। येती कांग्रेस पार्टी के ये घोषणा म 72 हज़ार रुपिया प्रति परिवार के हिसाब ले 5 करोड़ परिवार बर 3.6 लाख करोड़ के ख़रचा होही, जऊन मोदी सरकार कोति ले पहिलिच ले खरचा करे जात रकम के दू-तिहाई घलोक नइ हे।
मने जेटली के मुताबिक राहुल गाँधी जतका पइसा देहे के वादा करत हे, मोदी सरकार ओखर ले डेढ़ गुना ज़्यादा पइसा पहिलीच देश के ग़रीब मन ल दे देहे हे।

लउछरहा..