अउ पेयजल व्यवस्था, बिजली आपूर्ति, स्वास्थ्य सेवा, राशन वितरण, खाद-बीज भंडारण अउ निर्माण कार्य मन के निरीक्षण करिन
केसमर्दा म स्थापित बैगा परिवार मन ल मूलभुत सुविधा उपलब्ध कराए के निर्देश
कवर्धा, कलेक्टर श्री अवनीश कुमार शरण ह बिरसपत के दिन कई ठन विभाग मन के जिला स्तरीय अउ अनुभाग स्तरीय अधिकारी मन के संग बोड़ला अऊ पंडरिया विकासखंड के दुर्गम अउ वनांचल ग्रामीण ग्रामीण क्षेत्र मन के दौरा करके पेयजल व्यवस्था, बिजली आपूर्ति, स्वास्थ्य, राशन वितरण, खाद-बीज भंडारण अउ निर्माण कार्य मन के निरीक्षण करिन अऊ संबंधित अधिकारी मन ल जरूरी निर्देश दीन। उमन प्राथमिक स्वास्थ्य केन्द्र बैजलपुर अऊ आयुष्मान भारत योजना के तहत संचालित हेल्थ अउ वेलनेंस सेंटर बाकी (केसमर्दा) अऊ हेल्थ अउ वेलनेंस सेंटर पंडरीपानी के निरीक्षण करिन अऊ उहां उपलब्ध सुविधा मन के जानकारी लीन। उमन स्वास्थ्य केन्द्र मन म ओपीडी, दवा वितरण केन्द्र, प्रयोगशाला, जनरल वार्ड अउ जेचकी वार्ड के निरीक्षण करिन अउ चिकित्सक अउ स्वास्थ्य कार्यकर्ता मन के नियमित उपस्थिति के जानकारी लीन। उमन बैजलपुर म निर्माणाधीन प्राथमिक स्वास्थ्य केन्द्र ल लउहे पूरा कराए खंड चिकित्सा अधिकारी ल अऊ पानी ले कटाव रोके बर रिटर्निग वॉल के निर्माण नरेगा के माध्यम ले कराए बर सीईओ जनपद पंचायत बोड़ला ल निर्देश दीन। कलेक्टर ह ग्राम अमेरा म आदिवासी कन्या छात्रावास के जीर्ण होए अउ ओखर उपयोग नइ होए के सेती तुरंते ध्वस्त(डिस्मेंटल) कराए बर अनुविभागीय अधिकारी राजस्व बोड़ला ल निर्देश दीन। उमन अमेरा म विद्युत तार के झुकाव ल रोके बर विद्युत पोल लगाय उपअभियंता ल घलोक निर्देश दीन।
कलेक्टर ले हाथ मिलाके बहुत खुश होइस छत्तर सिंह बैगा
कलेक्टर श्री अवनीश कुमार शरण से केसमर्दा म विस्थापित बैगा परिवार मन ले मिलके समस्या सुने के बेरा म करीबन 85 बछर के छत्तर सिंह बैगा ह कलेक्टर के तीर पहुंचके उंखर से मिले के इच्छा जताईस, ए म कलेक्टर ह हामी भरिस अऊ उंखर से हाथ मिलाइस अऊ ओखर हाल-चाल पूछिन। कलेक्टर ले हाथ मिलाके छत्तर सिंह बैगा अड़बड़ खुश होइस अऊ अपन आप ल गौरवन्वित महसूस करिस।
पंडरीपानी म बर पेड़ के तरी चौपाल लगाके सुनिन मनखे मन के समस्या
कलेक्टर श्री अवनीश कुमार शरण ह पंडरीपानी म बर पेड़ के तरी चौपाल लगाके मनखे मन के समस्या सुनिन अऊ गांव वाले मन ले कहिन कि छोटे-छोटे स्थानीय समस्या मन के समाधान सरपंच अउ सचिव के माध्यम ले करावयं। उमन ईतवारी राम बैगा, लालजू बैगा अउ मानसिंह बैगा ले बिजली, पानी, स्वास्थ्य सुविधा, राशन वितरण आदि के जानकारी लीन। उमन मनखे मन के सुविधा बर शुरू करे गए बिरूहीलडीह एक्सप्रेस के घलोक जानकारी लीन। कलेक्टर ह बिरूहीलडीह म आधार कार्ड बनाए बर विशेष शिविर लगाय के घलोक निर्देश दीन। उमन बरसात ले पहिली राशन भंडारण, स्कूल मन म पाठ्य पुस्तक वितरण, स्थानीय जनप्रतिनिधि मन के उपस्थिति म शाला प्रवेशोत्सव मनाए अउ आंगनबाड़ी केन्द्र मन के सतत् निरीक्षण करे के निर्देश दीन।
पर्यावरण प्रेमी अऊ छह सौ ले जादा वृक्ष तैयार करइया अवधराम ले प्रभावित होइन कलेक्टर
प्राथमिक स्वास्थ्य केन्द्र बैजलपुर म ग्राम कामाडबरी ले ईलाज कराए आये 80 बछर के अवध राम ले चर्चा के समय पता चलिस कि ग्रामीण वृद्ध अवध राम पर्यावरण प्रेमी हे अऊ अपन उमर म छै सौ ले जादा आमा, बर, पीपर, सगौना आदि के पेड़ लगाये हे। ए जानकारी म कलेक्टर श्री अवनीश कुमार शरण अवध राम ले काफी प्रभावित होइन अऊ ऊंखर ले पूछिन कि आप मन ल पेड़ लगाय ले का फायदा होथे, ए म अवध राम ह कहिन कि ओ मन ल आत्म शांति मिलथे अउ ऊंखर हाथ ले लगाये आमा ल लइका मन ल तोड़त देखे म खुशी होथे। उमन बताइस कि पेड़-पौधा लगाना उंखर आदत म शुमार हे, ओ मन पचराही म बड़ संख्या म आमा के पेड़ लगाये हें, एखरे संगेच तालाब, गौठान, देव स्थल आदि स्थान मन म पेड़ लगाथें। उनला पर्यावरण सुरक्षा के प्रति काफी लगाव हे।
