शहीद वीर नारायण सिंह स्मृति लोक नृत्य महोत्सव : कोण्डागांव पहिली, बस्तर दूसर, दंतेवाडा तीसर स्थान म

  • राष्ट्रीय आदिवासी लोककला महोत्सव म कोण्डागांव के बिंजे, दंतेवाडा के पालनार, बस्तर के बड़े किलेपाल अऊ कोण्डागांव के चिखलीडीह के नर्तक दल ल मिलही अवसर

रायपुर, राज्य स्तरीय शहीद वीर नारायण सिंह स्मृति आदिवासी लोक नृत्य महोत्सव म कोण्डागांव जिला के चिखलीडीह के सोमनाथ दुग्गा अऊ साथी मन ह पहिली, बस्तर जिला के बड़े किलेपाल के गणेश मण्डावी अउ साथी मन के नर्तक दल ल दूसर, दंतेवाडा जिला के पालनार के कोयाराम अउ साथी मन के नर्तक दल ह तीसर स्थान प्राप्त करिस। महोत्सव म कबीरधाम जिला के रामपुर ठाठापुर के जय बूढादेव मितानी कर्मा दल ल सांत्वना पुरस्कार प्रदान करे गीस। आदिम जाति अऊ अनुसूचित जाति विकास विभाग के सचिव श्री डी.डी. सिंह अऊ संचालक श्री मुकेश कुमार बंसल ह विजेता नर्तक दल मन म पहिली पुरस्कार एक लाख रूपिया, दूसर पुरस्कार 50 हजार रूपिया, तीसर पुरस्कार 25 हजार रूपिया अऊ सांत्वना पुरस्कार 10 हजार रूपिया के संग प्रशस्ती पत्र घलोक प्रदान करे गीस।

राज्य स्तरीय शहीद वीर नारायण सिंह स्मृति आदिवासी लोक नृत्य महोत्सव म आदिवासी नृत्य कलाकार मन ल चार अलग-अलग विधा पारंपरिक त्यौहार, विवाह, फसल कटाई अऊ आन ओपन केटेगिरी म नर्तक दल मन ह अपन प्रतिभा के प्रदर्शन करिन। पारंपरिक त्यौहार के विधा म कोण्डागांव जिला के बिंजे के बल्दु राम अउ साथी मन के दल, विवाह विधा म दंतेवाडा जिला के पालनार के कोयाराम अउ साथी मन के दल, फसल कटाई विधा म बस्तर जिला के बड़े किलेपाल के गणेश मण्डावी अऊ साथी मन के दल अऊ आन ओपन केटेगिरी विधा म कोण्डागांव जिला के चिखलीडीह के सोमनाथ दुग्गा अउ साथी मन के दल ह पहिली स्थान प्राप्त करिस। ए चारों विधा मन म पहिली स्थान प्राप्त करइया नर्तक दल मन ल ये साल राज्य शासन कोति ले 27, 28 अऊ 29 दिसम्बर के प्रदेश के राजधानी रायपुर म आयोजित राष्ट्रीय आदिवासी लोककला महोत्सव म सामिल होए के अवसर मिलही।

अइसनहे पारंपरिक त्यौहार विधा म जय माता दीन करम नर्तक दल टाटीडांड़ जिला जशपुर ह दूसर अऊ महिला अदिवासी करमा नृत्य तोलमा जिला रायगढ़ के श्रीमती अनिता टोप्पो अउ साथी मन के दल ह दूसर स्थान प्राप्त करिस। विवाह विधा म भुंजिया नर्तक दल टेंवारी जिला गरियाबंद ह दूसर अऊ आदिवासी जय लिंको नृत्य ग्राम आंको विकासखण्ड छुरिया जिला राजनांदगांव ह तीसर स्थान प्राप्त करिस। फसल कटाई विधा म जय बुढादेव मितानी करमा दल रामपुर ठाठापुर जिला कबीरधाम ह दूसर अऊ कर्मा नर्तक दल कृष्णपुर जिला सूरजपुर ह तीसर स्थान प्राप्त करिस। आन ओपन केटेगिरी विधा म शासकीय उच्चतर माध्यमिक शाला धनौली जिला बिलासपुर ह दूसरी अऊ खैरोदाई सुवा नृत्य दल केसला जिला बलौदाबाजार ह तीसर स्थान प्राप्त करिस। एकरे संगेच सबो भाग लेवइया दल मन ल प्रशस्ती पत्र प्रदान करे गीस।

महोत्सव म सामिल हरेक दल ल अपन कला के प्रदर्शन बर 10 मिनट के समय दे गीस अऊ नर्तक दल मन के वेशभूषा, नृत्य शैली, गीत अऊ दर्शक मन उपर प्रभाव के आधार म निर्णायक मन कोति ले विजेता मन के चयन करे गीस।

लउछरहा..