समाजिक मंच म बीजेपी-कांग्रेस म रजवाड़ी धक्का-पेली, बीजेपी ह मुखिया भूपेश बघेल ल अउ लगाइस आरोप
धमेन्द्र निर्मल के सार समाचार, छत्तीसगढ़ म लोकसभा चुनई जइसे-जइसे नजिक आवत हे ओइसनेहे चुनई अखाड़ा म गहमागहमी बाढ़त जात हे। मुहबजइ के बीच रजवाड़ी दल मन समाजिक मंच म घलो मोर्चा खोल डारे हावय। बीजेपी ह फेर एक पइत कांग्रेस ल हुमेने बर दउँड़े हे। छत्तीसगढ़ बीजेपी ह ट्वीट के जरिया कांग्रेस के शराबबंदी के वादा उपर निशाना साधे हे। बीजेपी ह आरोप लगाए हे कि शराबबंदी के वादा करइया कांग्रेस सरकार खुदे जादा कीमत म छत्तीसगढ़ म शराब बेचत हावय। संगे संग बीजेपी ह मुखिया भूपेश बघेल उपर निशाना साधके गंभीर आरोप घलो लगाए हे। बीजेपी ह अपन ट्वीट म लिखे हे कि छत्तीसगढ़ में रहना हे रिलैक्स, त दौ भूपेश टैक्स। बीजेपी ह कांग्रेस उपर आरोप लगाए हे कि पार्टी व्यापारी मन ले वसूली करत हावय। इहां तक के बीजेपी ह कोल ट्रांसपोर्टेशन उपर घलो अबड़ जबर सवाल खड़ा कर दे हे।
बीजेपी के ट्वीट उपर पूर्व सीएम डॉ. रमन सिंह के कहना हे कि छत्तीसगढ़ में चुनाव ल देखत वसूली अभियान चलत हावे। एकर लिखित शिकायत घलो मिलत हावय। डॉ. रमन सिंह कहिन कि वसूली के बिरोध म लोगन आंदोलित होवत हावय। जउन किसम ले वसूली होवत हे ओकर ले हाहाकार मचगे हावय। उहेंचे कांग्रेस के आईना पॉलिटिक्स उपर डॉ. रमन सिंह के कहना हे कि कांग्रेस आईना एकर सेती भेजत हे काबर के उन्कर थोथना करिया गे हावयं। उन्कर सरकार म जमीन से लेके आसमान तक घोटाला होए हे। उनला आईना देखे के जरूरत नहीं हे तेकर पाए के अपन घर ले आईना फेंकत हे अउ परोसी ल देवत हे। असल म काहे मुख्यमंत्री भूपेश बघेल ह कुछ दिन पहिली पीएम नरेंद्र मोदी ल एक ठो आईना दान म भेजे रिहिन हे। सीएम बघेल ह ट्वीट के जरिया बीजेपी ल अपन असली चेहरा देखे के बात कहे रिहिन हे।
चटकारा:-
धृतराष्ट:- देख तो रे संजय ! काय अब्बड़ चिचियाए-किकियाए के शोर सुनावत हे ?
संजय:- कुछू नहीं कका ! चुनई खुड़वा मात गे हे त सब एक दूसर ल हुमेलत सिंगियावत हे।
धृतराष्ट:- अउ ये बस्सावत हे तेन हं काय ये ?
संजय:- भइगे, उहीं मन ह चुनाव छाप मंद पीये हें। मन ह बसियाए हे ते बसियाए हे तन अउ बचन सब्बो बसिया गे हे।
