- बस्तर के मनखे मन ल अब इलाज बर बाहिर नइ जाना परय- मुख्यमंत्री श्री बघेल
- आपातकालीन, आईसीयू, ओटी अऊ ओपीडी के लोकार्पण
जगदलपुर, मुख्यमंत्री श्री भूपेश बघेल ह आज बस्तर के जनता ल एक अऊ बड़का सौगात देवत महारानी अस्पताल के बहुप्रतीक्षित आधुनिकीकरण अऊ नवीनीकरण के पहिली चरण के काम के लोकार्पण करिन। मुख्यमंत्री ह करीबन 7 करोड़ रूपिया के लागत ले निर्मित सर्वसुविधायुक्त आपातकालीन कक्ष, आईसीयू, आपरेशन थियेटर अऊ ओपीडी के विधिवत शुभारंभ करिन। ये अस्पताल म अत्याधुनिक चिकित्सा सुविधा उपलब्ध होए ले जनता के मेडिकल कॉलेज म निर्भरता कम होही अऊ उहें शहर के भीतरेच बनेच चिकित्सा सुविधा मिलही।
मुख्यमंत्री श्री बघेल ह ये बेरा म अपन संक्षिप्त उदबोधन म कहिन कि जब श्री राहुल गांधी बस्तर आए रहिन, तब उमन कहे रहिन, कि अइसन व्यवस्था करे जाय कि बस्तर के मनखे मन ल इलाज बर बाहिर झन जाना परय, बल्कि बाहिर के मनखे बस्तर इलाज बर आवय। आज बीजापुर म सीटी स्केन अऊ जगदलपुर म महारानी अस्पताल के आधुनिकीकरण काम के लोकार्पण ये बतात हे कि बस्तर म स्वास्थ्य सुविधा बनेच होवत हे अऊ अब बस्तर के बाहिर के मनखे घलोक जगदलपुर इलाज बर आहीं। श्री बघेल ह कहिन कि जब ये साल एक जनवरी म जगदलपुर आए रहेंव, तब इहां के जनप्रतिनिधि मन ह महारानी अस्पताल के अव्यवस्था मन अऊ समस्या मन के जिक्र करे रहिन। तब मैं ह इहां के कलेक्टर अऊ अस्पताल प्रबंधन ल अस्पताल के जीर्णोद्धार करके स्वास्थ्य सुविधा विकसित करे के निर्देश दिए रहेंव। मुख्यमंत्री ह कहिन कि आज ये बात के खुशी हे, कि रिकार्ड समय म ये अस्पताल आधुनिक स्वास्थ्य सुविधा मन के संग नवा स्वरुप म आ गीस। अइसन लगतेच नइ हे कि ये उही महारानी अस्पताल ये। अब बस्तर के मनखे मन ल बनेच चिकित्सा सुविधा उपलब्ध होही। उमन कहिन कि ये अस्पताल म जऊन जरुरी आवश्यकता होही, ओला पूरा करे जाही। मुख्यमंत्री ह रिकार्ड समय म अस्पताल के कायाकल्प करे बर सांसद श्री दीपक बैज, विधायक श्री रेखचंद जैन, कलेक्टर डॉ. अय्याज तम्बोली अऊ अस्पताल प्रबंधन ल सहराइन।
ये बेरा म सांसद श्री दीपक बैज अऊ विधायक श्री रेखचंद जैन ह घलोक जनसमूह ल संबोधित करिस। कार्यक्रम म शिक्षा मंत्री अऊ जिला के प्रभारी मंत्री डॉ. प्रेमसाय सिंह टेकाम, कोंडागांव विधायक श्री मोहन मरकाम, विधायक नारायणपुर श्री चदंन कश्यप, महापौर श्री जतीन जायसवाल, श्री राजीव शर्मा, कलेक्टर डॉ. अय्याज तम्बोली, पुलिस अधीक्षक श्री दीपक झा संग जनप्रतिनिधिगण, स्वास्थ्य विभाग के अधिकारी-कर्मचारी अऊ गणमान्य नागरिक उपस्थित रहिन।
मुख्यमंत्री ह करिस महारानी के प्रतिमा के अनावरण
मुख्यमंत्री श्री भूपेश बघेल ह अस्पताल के नवीनीकरण काम के लोकार्पण के बाद अस्पताल के मुख्य द्वार म महारानी प्रफुल्ल कुमारी देवी के नवनिर्मित प्रतिमा के अनावरण करिन। उमन महारानी ल श्रद्धासुमन अर्पित तको करिन।
