महिला सशक्तिकरण खातिर निःशुल्क मोटर ड्राईविंग प्रशिक्षण

जिला प्रशासन जशपुरनगर के नवा पहल

धमेन्‍द्र निर्मल के सार समाचार, जशपुर जिला म माइलोगन मन ल पोठ (सशक्त) अउ आत्मनिर्भर बनाए के उद्देश्य से कलेक्टर श्री निलेशकुमार महादेव क्षीरसागर के विशेष पहल ले ’जज्बात-ए-जशपुर’ के तहत् मोटर ड्राईविंग के निःशुल्क प्रशिक्षण देहे के कार्यक्रम शुरू करे गे हवय। जशपुर जिला मुख्यालय में आज बिहिनिया कलेक्टर ह कार ड्रायविंग प्रशिक्षण कार्यक्रम के विधिवत श्रीगणेष करत जम्मो महिला नगर सैनिक अउ आने महिला प्रशिक्षणार्थी मन ल बधई अउ शुभकामना दीस। ये बेरा म जिला सेनानी योग्यता साहू, प्राचार्य विनोद गुप्ता अउ मोटर ड्रायविंग प्रशिक्षण संस्थान के डायरेक्टर संघरे रिहिन।



कलेक्टर श्री निलेशकुमार ह बताइन कि जिला प्रशासन डाहर ले शुरू करे गे ये कार्यक्रम के अवइया भविष्य म विस्तार घलो करे जाही। आगामी एक हफ्ता के भीतर कुनकुरी म तको मोटर कार ड्रायविंग के निःशुल्क प्रशिक्षण शुरू करे जाही। एकर उद्देश्य आर्थिक रूप ले कमजोर वर्ग के माइलोगन मन ल मोटर ड्राईविंग के प्रशिक्षण देके उन मन ल आयमूलक काम बूता ले जोड़ना हवय। उन मन बताइन कि जशपुर नगर म एकर मुहतुर कमजोर वर्ग के इच्छुक माइलोगन मन के संगे संग महिला नगर सैनिक मन के मोटर कार ड्रायविंग के प्रशिक्षण ले करे गिस हवय। जिला के जम्मो विकासखंड मुख्यालय म अनुसूचित जाति, जनजाति अउ आने वर्ग के आर्थिक रूप ले कमजोर परिवार के लइकुसहिन अउ माइलोगन मन ल मोटरकार ड्रायविंग के प्रशिक्षण देहे जाही। एहू बात ल लेके घलो तियारी अउ हितग्राही मन के चयन के प्रक्रिया ल लउहे शुरू करे जाही।



कलेक्टर ह बताइन कि ये प्रशिक्षण 45 दिन के होही। प्रशिक्षण देवइया संस्थान अउ आरटीओ डाहर ले प्रशिक्षण उपरांत सफल प्रशिक्षणार्थी मन ल ड्रायविंग लाईसेंस घलो निःशुल्क तियार करवा के देहे जाही। जशपुर नगर म 24 महिला नगर सैनिक मन ल हरेक दिन बिहिनिया 7 ले 10 बजे तक अउ आने वर्ग के 32 माइलोगन मन ल बिहिनिया 5-7 बजे अउ संझा 4-6 बजे तक प्रशिक्षण देहे जाही।



चटकारा
भकमुड़ुवा:- काली एक पउवा शेर छाप मार के आए रहेंव, मोर सुवारी अइसन हनियाइस के जम्मो नसा उतर गे भाई।
ठेठर्रा:- उं तैं गलती करथस। जब जानत हस कि बाई ह चंडी हे त तोला बइला बन के घर म घुसरना चाही न। शेर बनके जाबे त चंडी ह अपन सवारी ल थोरे छोड़
दिही, वो तो चढ़बेच करही बइहा।

चित्र गूगल से …

लउछरहा..