नारायणपुर म जिला म मैराथन दौड़ के होही आयोजन

विकासखंड स्तरीय मैराथन दौड़ 10 जनवरी अऊ जिला स्तरीय 25 जनवरी के

नारायणपुर, जिला म हर बछर जइसे ये साल घलोक जिला प्रशासन अऊ खेल अउ युवा कल्याण विभाग जिला नारायणपुर कोति ले विकासखंड अउ जिला स्तरीय मैराथन दौड़ के आयोजन करे जाही। जिला के दुनों विकासखंड नारायणपुर अऊ ओरछा म विकासखंड स्तरीय मैराथन दौड़ के आयोजन ये महीना के 10 तारीक के करे जाही। उहें जिला स्तरीय मैराथन दौड़ के आयोजन 25 जनवरी के बिहनचे 9 बजे बालक क्रीड़ा परिसर नारायणपुर म आयोजित होही।

खेल अधिकारी, खेल अउ युवा कल्याण विभाग नारायणपुर ह जानकारी देवत बताइन कि विकासखंड स्तरीय मैराथन दौड़ के पहिली 15-15 महिला पुरूष धावक मन के चयन जिला स्तरीय मैराथन दौड़ बर करे जाही। विकासखंड स्तरीय मैराथन दौड़ बर पुरूष वर्ग बर 10 किलोमीटर अऊ महिला वर्ग बर 5 किलोमीटर के दूरी निरधारित करे गए हे। उहें जिला स्तरीय मैराथन दौड़ बर पुरूष वर्ग 20 किलोमीटर अऊ महिला वर्ग 10 किलोमीटर के दौड़ लगाहीं। इच्छुक धावक पंजीयन बर कार्यालय खेल अधिकारी खेल अउ युवा कल्याण विभाग नारायणपुर, मुख्य कार्यपालन अधिकारी जनपद पंचायत नारायणपुर/ ओरछा, खण्ड शिक्षा अधिकारी नारायणपुर/ ओरछा अऊ बालक क्रीड़ा परिसर नारायणपुर म संपर्क कर सकत हें। विकासखंड अउ जिला स्तरीय मैराथन दौड़ म विजयी भाग लेवईया मन ल पुरस्कृत करे जाही।