जशपुरनगर, जशपुर जिला के फरसाबहार जनपद के ग्राम पंचायत बोखी म 6 एकड़ म बने मॉडल गौठान के मवेशी मन ल अब लउहे हरियर चारा मिले लागेही। ए बर चारागाह के कुल 11 एकड़ जमीन म ले तीन एकड़ म नेपियर घास लगाए गए हे। चारागाह के बाचे हिस्सा म हरियर चारा बर मक्का,ज्वार आदि के बुवाई के तैयारी करे जात हे।
मॉडल गौठान बोखी म गांव के करीबन डेढ़ सौ किसान मन के पशुधन जेकर संख्या करीबन 538 हे, आए लगे हे। ए मवेशी मन बर फिलहाल सूक्खा चारा के व्यवस्था गांव वाले मन अउ किसान मन कोति ले दान म दे गे पैरा ले करे जात हे। जनपद पंचायत के मुख्यकार्यपालन अधिकारी श्री बी.एलसरल ह बताइस कि गौठान के चारो कोती सीपीटी के निर्माण पूरा कर ले गीए हे। मवेशी मन के पेयजल के व्यवस्था गौठान म खोदाए ट्यूबवेल अउ सोलरपंप के माध्यम ले करे जात हे। इहां नरेगा ले कुंआ के निर्माण घलोक कराये जात हे। मॉडल गौठान म मवेशी मन के पेयजल बर सात नग टंकी अउ चारा बर तीन नग कोटना के निर्माण कराये गए हे। पैरा रखे बर 10 नग मचान घलोक बनाय गए हे। मवेशी मन के बइठने बर 5 चबुतरा के निर्माण कराये गए हे। मॉडल गौठान म 30 वर्मीबेड स्थापित करे के लक्ष्य हे। अब तक 10 वर्मीबेड तियार करे गए हे। गौठान म वृक्षारोपण के घलोक तैयारी पूरा कर ले गए हे।
ग्राम पंचायत बोंखी म 43 किसान मन के इहां बाड़ी विकास के काम घलोक कराये जात हे। किसान मन ल बाड़ी म लगाये बर सब्जी बीज घलोक देहे गए हे। गौठान के देख-रेख अउ संचालन बर 28 सदस्यीय समिति गठित करे गए हे। हर एक बुधवार के दिन समिति के बैठक नियमित रूप ले होवत हे।
